مرید، اپنے پیر و مرشد سے کسی مسئلہ میں اختلاف کرسکتاہے؟

کیا اختلافی مسائل میں مرید کی رائے پیر کے موافق ہونا ضروری ہے؟ بعض لوگ کہتے ہیں کہ ضروری ہے ورنہ پیر سے کما حقہ فائدہ نہیں ہوگا، آپ کیا فرماتے ہیں؟

الجوابُ حامِدا ًو مُصلیِّا ً

جاننا چاہیے کہ اصلاح نفس کی نیت سے کسی پیر کے ساتھ بیعت ہونے کے بعد اس کی اتباع ضروری ہے، البتہ یہ اتباع صرف اور صرف طرق تربیت و تشخیص امراض و تجویز تدابیر اور ان مسائل میں ضروری ہے جن کا تعلق اصلاح تربیت باطنی سے ہے، وہ بھی اس وقت تک جب تک کہ ان کا جو از مرید و شیخ کے در میان متفق علیہ ہو، اور اگر اختلاف ہو تو شیخ سے مناظرہ کرناخلاف طریق ہے (یعنی آداب طریقت کے خلاف ہے ) ایسی صورت میں ادب یہ ہے کہ علما سے استفتاء کر کے یا اپنی تحقیق سے حکم متعین کر کے شیخ کو اطلاع کرے کہ میں فلاں عمل کو جائز نہیں سمجھتا اور ہمارے سلسلہ میں اس کی تعلیم ہے مجھ کو کیا کرناچاہیے، اس پر اگر شیخ پھر بھی وہی حکم دے تو اس شیخ کو چھوڑ دینا چاہیے اور اگر وہ ترک کی اجازت دے تو یہ بھی اس کی متابعت ہے، یہ معنی ہیں اتباع کامل کے یعنی جو مرض نفسانی اس نے تجویز کیا ہو یا جو تدبیر اس نے تجویز کی ہو، یا جس کا مشروع ہونا شیخ و مرید میں متفق علیہ ہو، تجویز کیا ہو، ان چیزوں میں اتباع کامل کرے ، ذرا بھی اپنی رائے کو دخل نہ دے اور باقی امور میں اتباع مراد نہیں۔
لہذا مذکورہ تفصیل سے یہ بات واضح ہوگئی کہ شیخ کے ساتھ اختلاف رائے رکھنا درست ہے،لیکن یہ اختلاف بھی حدود کے دائرے میں رہ کر رکھنا چاہیے۔
(ماخوذ از تربیت السالک بتغییر یسیر تالیف حکیم الامت مولانا اشرف علی تھانوی رحمہ اللہ)