کاروباری پریشانی کے لیے مجرّب عمل

کیا فرماتے ہیں علماءِکرام و مفتیانِ عظام اس مسئلہ کے بارے میں کہ غیر اعتمادی کی وجہ سے مجھے اپنے آپ سے نفرت ہو رہی ہے، اس وجہ سے نہ نماز میں دل لگتا ہے، نہ تلات میں، اور نہ ہی دنیاوی کاروبار میں، حالانکہ اللہ کے فضل سے تبلیغ میں وقت بھی لگاتا رہتا ہوں، لیکن روزبروز اپنی ذات سے نفرت بڑھتی رہتی ہے۔میرا ہرکام میری توقعات کے عین مخالف ہو جاتا ہے، اور آج تک کسی کام میں کامیابی نہیں ہوئی، میری عمر چوبیس(۲۴) سال ہے، لیکن مسلسل ناکامیوں کی وجہ سے چالیس(۴۰) سال کا لگ رہا ہوں۔ براہِ مہربانی میرا مسئلہ سنجید گی سے حل کر کے میری زندگی بچائیں، سخت پریشانی کا شکار ہوں،نیز اچھے روزگار کےلیے کوئی وظیفہ بھی تحریر کریں۔

الجوابُ حامِدا ًو مُصلیِّا ً

محترم سائل صاحب ! بلاوجہ پریشان و نااُمید ہونے کی ضرورت نہیں، ربِّ کریم کی قدرتِ کاملہ پر نظر رکھتے ہوئے اپنے مشاغل اور پنج وقتہ فرائض کی بجاآوری میں لگے رہیں انشاء اللہ ضرور بہتری ہوگی، تاہم اگر آپ کےلیے ہمارے یہاں جامعہ بنوریہ سائٹ ایریا کراچی تشریف لانا ممکن ہو تو بہتر ورنہ تیسرے کلمہ کا ورد بکثرت کریں خصوصاً صبح و شام کی نماز کے بعد تو سو مرتبہ ضرور پڑھ لیا کریں اور اس طرح اس کے بعد دعا بھی کیا کریں اور یہ عمل اکیس دن رکھنے کے بعد اپنی ایمانی کیفیت کے بارے میں ضرور آگاہ کریں۔
جبکہ نمازِ عصر کے بعد سات مرتبہ سورہ مزمل، ایک مرتبہ سورہ واقعہ اور (یارزّاقُ، یا لطِیفُ، یا قَوِیُّ، یا ودُوْدُ، یا روُوْفُ) ایک سو گیارہ مرتبہ پڑھ کر دعا کیا کریں اور یہ عمل چاند کی تاریخ کے اعتبار سے پہلے یا دوسرے عشرے کے پیر یا بدھ کے دن شروع کر کے چالیس دن تک مسلسل اسی وقت پڑھنے کا معمول بنا لیں، ان شاءاللہ کاروباری پریشانی ضرور ختم ہو کر رہے گی ، یہ نسخہ انتہائی مجرب ہے۔