غیر مسلم کے ریسٹورنٹ میں کھانا کھانا

امریکہ میں ہم بہت سی جگہوں پر جاتے ہیں جو جزوی طور پر حلال ہوتے ہیں، کچھ مینو حلال ہوتا ہے، یا وہ شراب سور کا گوشت پیش کرسکتے ہیں، تو کیا ہم کسی ایسے ریسٹورنٹ میں کھاسکتے ہیں جہاں شراب اور سور کا گوشت پیش کیا جاتا ہے؟ اگر دستیاب ہو توہم صرف سبزی حلال گوشت کا آرڈر دیں گے، اور صرف جائز اشیاء اور ہماری میز پر کوئی بھی شراب یا سور کے گوشت کا آرڈر نہیں کرے گا۔

الجوابُ حامِدا ًو مُصلیِّا ً

غیر مسلموں کے جن ہوٹلوں میں سؤر اور شراب جیسی حرام اشیاء بھی فراہم کی جاتی ہوں وہاں سبزی اور اس جیسی دیگر اشیاء کا کھانا (بشرطیکہ اس میں کسی حرام چیز کی آمیزش نہ ہو) اگر چہ جائز ہے،لیکن اگر ان ہوٹلز میں حلال اور حرام اشیاء کے لئے الگ الگ برتن استعمال کرنے کااہتمام نہ ہو، تو ایسے ہوٹلوں میں کھانے سے حتی الامکان احتیاط لازم ہے، جبکہ ایسی جگہوں پر حلال جانور کے گوشت کا مل جانا یا کسی غیر مسلم کا اسے حلال قرار دینا اس کی حلت کے لیے کافی نہیں ہے، بلکہ اس حلال جانور کو شرعی اصولوں کے مطابق ذبح کرنابھی ضروری ہے، اس لیے ایسی جگہوں پر قابل اعتبار اور مستند ذرائع سے اس کے حلال ہونے کی تصدیق جب تک نہ ہوجائے (جس کاعمومی طریقہ اس پروڈکٹ کا کسی مستند مسلم دینی ادارے سے حلال سرئیفائڈ ہونا ہے) اس وقت تک اس کے استعمال سے احتراز لازم ہے۔

مأخَذُ الفَتوی

کما فی سنن الترمذی: حدثنا علي بن عيسى بن يزيد البغدادي، قال: حدثنا عبيد الله بن محمد العيشي، قال: حدثنا حماد بن سلمة، عن أيوب، وقتادة، عن أبي قلابة، عن أبي أسماء الرحبي، عن أبي ثعلبة الخشني، أنه قال: يا رسول الله، إنا بأرض أهل الكتاب، فنطبخ في قدورهم، ونشرب في آنيتهم، فقال رسول الله صلى الله عليه وسلم: إن لم تجدوا غيرها فارحضوها بالماء ثم قال: يا رسول الله، إنا بأرض صيد، فكيف نصنع؟ قال: إذا أرسلت كلبك المكلب، وذكرت اسم الله، فقتل فكل، وإن كان غير مكلب، فذكي فكل، وإذا رميت بسهمك، وذكرت اسم الله، فقتل فكل (3/ 311 رقم الحدیث 1797)۔
وفی الدرالمختار: وأصله أن خبر الكافر مقبول بالإجماع في المعاملات لا في الديانات وعليه يحمل قول الكنز ويقبل قول الكافر في الحل والحرمة يعني الحاصلين في ضمن المعاملات لا مطلق الحل والحرمة الخ (6 /345)۔