سالے کو تین طلاق پر مشتمل وائس میسج بھیجنے کاحکم

میں نے اپنی بیوی کو اسٹام پیپر پر یونین کونسل کے ذریعے 3 طلاق جمع کروائی ہیں،اور میں نے اپنے سالے کو واٹس ایپ کے ذریعے طلاق وائس میسج میں بھیجی ہیں، ڈائریکٹ اپنی بیوی کو کچھ نہیں بولا، کیا طلاق ہوگئی ہے یا نہیں؟

الجوابُ حامِدا ًو مُصلیِّا ً

سائل نےنکاح و رخصتی کے بعد اپنی بیوی کو اگر واضح اور صریح الفاظ جیسے " میں تمہیں طلاق دیتا ہوں" کے ذریعہ بیوی کو تحریری اور بذریعہ وائس میسج زبانی تین طلاقیں دیدی ہوں (اگرچہ بیوی کوبالمشافہ کچھ نہ بولا ہو ) تب بھی اس سے سائل کی بیوی پر تینوں طلاقیں واقع ہو کر حرمتِ مغلظہ ثابت ہو چکی ہے اب رجوع نہیں ہو سکتا اور حلالۂ شرعیہ کے بغیر دوبارہ باہم عقدِ نکاح بھی نہیں ہوسکتا ، لہذا دونوں پر لازم ہے کہ فوراً ایک دوسرے سے علیحدگی اختیار کریں اور میاں بیوی والے تعلقات ہر گز قائم نہ کریں ، ورنہ دونوں سخت گناہ گار ہوں گے ، جبکہ عورت ایامِ عدت گزارنے کےبعد دوسری جگہ نکاح کرنے میں بھی آزاد ہے ۔

مأخَذُ الفَتوی

کما فی رد المحتار تحت : ( قولہ طلقت بوصول الکتابۃ ) أی الیھا ( الی قولہ) ولو استکتب من آخر کتاباً بطلاقھا و قرأہ علی الزوج فأخذہ الزوج و ختمہ و عنونہ و بعث بہ الیھا فأتاہ و قع الخ ( کتاب الطلاق ، ج 3 ، ص 246 ، ط : سعید )۔
و فی الھندیۃ : وإن كان الطلاق ثلاثا في الحرة وثنتين في الأمة لم تحل له حتى تنكح زوجا غيره نكاحا صحيحا ويدخل بها ثم يطلقها أو يموت عنها كذا في الهداية الخ ( فصل فیما تحل بہ المطلقۃ، ج 1، ص 473، ط: ماجدیہ)۔