لائسنس فروخت کرنے کا حکم

السلام علیکم! Pakistan engineering council انجینئرز کو license دیتی ہے کہ آپ کام کر سکتے ہیں، پاکستان میں کوئی contractor بغیر اس لائسنس کے کام نہیں کرسکتا تو اس میں انجینئرز 3 کام کرتے ہیں
1.کچھ ان contractor کے پاس نوکری کرتے ہیں ۔
2. ایک بڑی تعداد سال کے لیے اپنا license اس contractor کو ایک سال کے لیے بیچ دیتے ہیں۔
3. اور ان میں بعض ویسے بغیر کسی پیسے کے اپنا license کسی contractor کو دے دیتے ہیں تعلق کی بنیاد پر مثلاً دوستی کی وجہ سے، تو اس پر دین کیا کہتا ہے کہ آخری نمبر والے کے بارے میں چونکہ انجینئرر کی غیر موجودگی میں تعمیرات یا کوئی بھی انجینئرنگ کا کام ہوتا ہے آیا کہ یہ جائز ہے یا ناجائز اس انجینئر کے لئے؟

الجوابُ حامِدا ًو مُصلیِّا ً

واضح ہو کہ ڈگری اور لائسنس کوئی مال نہیں بلکہ ایک تصدیق اور اجازت نامہ ہے جو حکومت کی طرف سے متعلقہ شخص کو مطلوبہ تعلیم پر مشتمل کورس کی تکمیل اور مہارت کے حصول کے بعد دیا جاتا ہے ، اور اس کا استعمال قانوناً بھی اس کی ذات تک محدود ہوتا ہے، لہٰذا سوال میں ذکرکردہ تینوں صورتوں میں سے اگر پہلی صورت میں مذکور انجینئر کنٹریکٹر کے پاس نوکری کرے اور اپنی مہارت اور صلاحیت کے ساتھ اس کنٹریکٹ کو پایہ تکمیل تک پہنچائے تو یہ صورت شرعاً بھی جائز ہوگی، جبکہ دوسری اور تیسری صورت درج ذیل وجوہات کی بناء پر شرعاً جائز نہیں ۔
1۔ لائسنس کوئی مال نہیں کہ اسے کرایہ پر دیا جائے یا فروخت کردیا جائے ۔
2۔ کنٹریکٹر کا قانونی تقاضوں کو پورا کئے بغیر فقط دوستی کی وجہ سے کسی ایسے شخص کا لائسنس استعمال کرنا جو عملاً اس پروجیکٹ کی دیکھ بھال نہ کر رہا ہو شرعاً دھوکہ دہی پر مبنی عمل ہے۔
لہٰذا مذکور صورتوں میں غیر قانونی طور پر سرٹیفکیٹ کسی دوسرے شخص کو دیکر اس کی اجرت یا معاوضہ لینا شرعاً جائز نہیں، جس سے احتراز لازم ہے۔

مأخَذُ الفَتوی

کما فی صحیح مسلم: عن أبي هريرة أن رسول الله صلى الله عليه وسلم مر على صبرة طعام فأدخل يده فيها، فنالت أصابعه بللا فقال: «ما هذا يا صاحب الطعام؟» قال أصابته السماء يا رسول الله، قال: «أفلا جعلته فوق الطعام كي يراه الناس، من غش فليس مني» (99/1)۔
و في بحوث فى قضايا فقهیۃ معاصرة: هل يجوز لحامل رخصة الإيراد او الإصدار أن يبيع هذه الرخصة إلى تاجر آخر؟ (الى قوله) ولكن كل ذلك انما ياتي اذا كان في الحكومة قانون يسمح بنقل هذه الرخصة الى رجل آخر اما اذا كانت الرخصة باسم رجل مخصوص أو شركة مخصوصة ولا يسمح القانون بنقلها الى رجل آخر أو شركة أخرى فلا شبهة فى عدم جواز بيعها لأن بيعها يؤدي حينئذ إلى الكذب والخديعة فان مشترى الرخصة يستعملها باسم البائع لا باسم نفسه فلا يحل ذلك الا بأن يوكل حامل الرخصة بالبيع والشراء اھ(115/1)