بیوی کے حقوق ادا نہ کرنے کے اندیشہ کی وجہ سے طلاق دینا

ایک شخص کا نکاح اس کی رضامندی سے ہوا، مگر رخصتی نہیں ہوئی۔
نکاح کے بعد اس پر یہ بات واضح ہو گئی کہ وہ اس رشتے کو دل سے قبول نہیں کر پا رہا اور اسے یقین ہے کہ وہ ازدواجی زندگی نبھانے کے قابل نہیں ہوگا، نیز بیوی کے حقوق صحیح طور پر ادا نہیں کر سکے گا۔
ایسی صورت میں:
کیا اس شخص کے لیے زبردستی رخصتی کرنا اور نکاح کو برقرار رکھنا شرعاً درست ہے؟
اگر وہ اس رشتے کو نبھانے پر مطمئن نہیں تو کیا رخصتی سے پہلے نکاح ختم کرنا (طلاق یا باہمی رضامندی سے علیحدگی) جائز اور بہتر ہے تاکہ آئندہ ظلم، فساد اور گناہ سے بچا جا سکے؟
براہِ کرم اس بارے میں شرعی رہنمائی فرما دیں۔
جزاکم اللہ خیراً

الجوابُ حامِدا ًو مُصلیِّا ً

واضح ہو کہ اگر کسی شخص کو نکاح کرنے کے بعد بیوی کے حقوق صحیح طور پر ادا نہ کرنے اور بے انصافی کے مرتکب ہونے کا اندیشہ ہو تو ایسے شخص کے لیے شرعاً نکاح کرنا مکروہ تحریمی ہے ،اور اگر اسے بیوی کے حقوق ادا نہ کرنے اور ازدواجی زندگی نبھانے کے قابل نہ ہونے کا یقین ہو تو ایسی صورت میں پھر نکاح کرنا شرعاً حرام ہے ،لہذا صورت مسؤلہ میں مذکور شخص کو جب یہ یقین ہے کہ نہ وہ ازدواجی زندگی نبھانے کے قابل ہے اور نہ ہی بیوی کے حقوق صحیح طور پر ادا کرسکتا ہے جبکہ علاج معالجہ سے بھی افاقہ ممکن نہ ہو تو اس کے باوجود یہ نکاح برقرار رکھنا درست نہیں ہے ،بلکہ ایسے شخص کو چاہیے کہ رخصتی سے پہلے پہلے یہ نکاح ختم کرے ،تاکہ رخصتی کے بعد بیوی کے حقوق میں کوتاہی کے گناہ سے بچ سکے ،شرعاً اس طرح نکاح ختم کرنے میں کوئی ممانعت نہیں ہے ۔

مأخَذُ الفَتوی

کما فی ردالمحتار: (قوله: ومكروها) أي تحريما بحر (قوله: فإن تيقنه) ‌أي ‌تيقن ‌الجور ‌حرم؛ لأن النكاح إنما شرع لمصلحة تحصين النفس، وتحصيل الثواب، وبالجور يأثم ويرتكب المحرمات فتنعدم المصالح لرجحان هذه المفاسد اھ( كتاب النكاح،ج: 3،ص: 7،مط: دار الفکر بیروت۔)
وفی البحر: وصفته فرض وواجب وسنة وحرام، ومكروه، ومباح أما الأول فبأن يخاف الوقوع في الزنا لو لم يتزوج بحيث لا يمكنه الاحتراز عنه إلا به (الی قولہ) وأما الرابع فبأن يخاف الجور بحيث لا يمكنه الاحتراز عنه؛ لأنه إنما شرع لمصلحة من تحصين النفس وتحصيل الثواب وبالجور يأثم ويرتكب المحرمات فتنعدم المصالح لرجحان هذه المفاسد اھ،(کتاب النکاح،ج: 3،ص: 84،مط: دار الکتاب الاسلامی۔)
وفی الموسوعۃ الفقھیہ: قال الحنفية: يكون النكاح حراما إن تيقن الجور، لأن النكاح إنما شرع لمصلحة تحصين النفس وتحصيل الثواب بالولد الذي يعبد الله تعالى ويوحده، ‌وبالجور ‌يأثم ‌ويرتكب ‌المحرمات، فتنعدم المصالح لرجحان هذه المفاسد اھ،(کتاب النکاح، ‌‌رابعا: الحرمة،ج: 41،ص: 215،مط: دار السلاسل۔)