وائس میسج کے ذریعہ دی ہوئی طلاق کا حکم

السلام علیکم:دین کی روشنی میں آپ اپنا فیصلہ بتائیے میں۔۔۔۔ دو ماہ سے اپنے گھر میں بیٹھی ہوں بوجہ میرے شوہر کا تعلق کسی اور لڑکی سے ہیں ، میں نے بہت کوشش کی کہ میرا گھر بس جائے لیکن میرے شوہرنے بذریعہ وائس مسیج تین با ر مجھے طلاق دے دی اور آزاد کررہا ہوں کہا لیکن انھوں نے وائس مسیج میں کوئی نا م نہیں لیا ، اب جب اس کو تھا نے میں بلایا گیا تو وہ اس با ت پر راضی ہےکہ میں اور میرے بچوں کو رکھنے کےلئے تیار ہے، تو آپ دین کی روشنی میں میری اس بات کی اصلاح کریں کہ میں واپس ان کے ساتھ رہ سکتی ہو یا نہیں ۔
نوٹ :الفاظ طلاق یہ بولے ہیں :میں تیرے کو طلاق دے رہاہوں تین مرتبہ بولا پھر بولا آزاد کررہا ہوں تمہیں۔

الجوابُ حامِدا ًو مُصلیِّا ً

واضح ہو کہ طلاق واقع ہونے کے لئےبیوی کا نام لینا شرعاًضروری نہیں ،بلکہ اگر بیوی کو مخاطب کرتے ہوئے اور اس کی طرف نسبت کرتے ہوئے طلاق کے الفاظ کہے جائیں تو اس سے بھی شرعا طلاق واقع ہو جاتی ہے۔
لہذا سائلہ کا بیان اگر واقعۃ درست اور پر مبنی بر حقیقت ہو اس طور پر کہ سائلہ کے شوہر نے بذریعہ مسیج سائلہ کو مذکور الفاظ"میں تیرے کو طلاق دیتا ہوں " تین دفع کہہ دیئے ہوں تو اس سے سائلہ پر تین طلاقیں واقع ہو کر حرمت مغلظہ ثابت ہو چکی ہے اور ، اب رجوع نہیں ہو سکتا اور حلالہ شرعیہ کے بغیر دوبارہ باہم عقد نکاح بھی نہیں ہو سکتا ،لہذا دونوں پر لازم ہے کہ فوراً ایک دوسرے سے علیحدگی اختیار کریں اور میاں بیوی والے تعلقات ہر گزقائم نہ کریں ورنہ دونوں سخت گنہگار ہوں گے، جبکہ عورت ایام عدت گزرنے کے بعد دوسری جگہ نکاح کر نے میں بھی آزاد ہو گی ۔
اور حلالہ شرعیہ یہ ہے کہ عورت اپنے شوہر سے علیحدگی اور عدتِ طلاق گزارنے کے بعد بغیر کسی شرط کے کسی دوسر ے مسلمان شخص سے اپنا عقد ِ نکاح کرے ، چنانچہ اگر وہ دوسرا شخص بھی اس سےایک مرتبہ ہمبستری (جوکہ حلالہ شرعیہ کےتحقق لئے ضروری ہے )کے فورا ً بعد یا ازدواجی زندگی کے کچھ عرصہ بعد طلاق دیدے یا بیوی سے پہلے شوہر کا انتقال ہوجائے ، بہر صورت اسکی عدت گزرنے کے بعد وہ پہلے شوہر کے عقدِ نکاح میں آنا چاہے اور پہلا شوہر بھی اسے رکھنے پر رضامند ہو تو نئے مہر کے ساتھ گواہوں کی موجودگی میں دوبارہ عقدِ نکاح کرکے باہم میاں بیوی کی حیثیت سے زندگی بسر کرسکتے ہیں ، تاہم حلالہ اس شرط کے ساتھ کرنا کہ زوج ثانی نکاح کے بعد طلاق دے تاکہ زوج اول کیلئے عورت دوبارہ حلال ہوجائے مکروہ تحریمی ہے اور احادیث مبارکہ میں ایسا عمل کرنے والوں کو ملعون قرار دیا گیا ہے ، البتہ بغیر شرط کے بلاشبہ جائز اور درست ہے۔

مأخَذُ الفَتوی

کما فی التنزیل العزیز:الطلاق مرتان فامساک بمعروف او تسریح باحسان ( سورۃ البقرہ الآیہ 229 )
قال للہ تعالی: فَإِن طَلَّقَهَا فَلَا تَحِلُّ لَهُۥ مِنۢ بَعۡدُ حَتَّىٰ تَنكِحَ زَوۡجًا غَيۡرَهُۥۗ ( سورۃ البقرہ الآیہ: 230 )
وفي حاشية ابن العابدين : لو قال ‌امرأته ‌طالق ‌ولم ‌يسم ‌وله ‌امرأة معروفة طلقت استحسانا، وإن قال لي امرأة أخرى وإياها عنيت لا يقبل قوله: إلا أن يقيم البينة هذا ما ظهر لي فتأمل وراجع،اھ(ج:3 ص 272 باب الفاظ الطلاق ناشر : سعید)
وفیہ ایضاً وفی : بخلاف فارسية قوله ‌سرحتك وهو " رهاء كردم " لأنه صار صريحا في العرف على ما صرح به نجم الزاهدي الخوارزمي في شرح القدوري اهـ وقد صرح البزازي أولا بأن: حلال الله علي حرام أو الفارسية لا يحتاج إلى نية، حيث قال: ولو قال حلال " أيزدبروي " أو حلال الله عليه حرام لا حاجة إلى النية، وهو الصحيح المفتى به للعرف وأنه يقع به البائن لأنه المتعارف ثم فرق بينه وبين ‌سرحتك فإن ‌سرحتك كناية لكنه في عرف الفرس غلب استعماله في الصريح فإذا قال " رهاكردم " أي ‌سرحتك يقع به الرجعي مع أن أصله كناية أيضا، وما ذاك إلا لأنه غلب في عرف الفرس استعماله في الطلاق وقد مر أن الصريح ما لم يستعمل إلا في الطلاق من أي لغة كانت،اھ(ج؛3 ص: 299 ناشر : سعید)
وفی الھندیۃ:إن کان الطلاق ثلاثا فی الحرۃ وثنتین فی الامۃ لم تحل لہ حتی تنکح زوجا غیرہ نکاحاصحیحا ، الخ(ج: 1 ص : 473 فصل فيما تحل به المطلقة ناشر ؛ المطبعۃ الکبری لأمیریہ)