چچا سے بات کرنے پر معلق کی ہوئی طلاق کا حکم

میرے شوہر نے مجھے مشروط طلاق دی ہے ان الفاظ میں کہ "اگر تم نے میرے چچا سے بات کی تو میری طرف سے 2 طلاقیں ہیں"۔ میں نے ان کے چچا کو کال ملائی ضرور مگر رابطہ نہیں ہو سکا اور بات نہیں ہوئی۔ کیا اس صورت میں طلاق ہو گئی ہے؟ مہربانی کر کے جلد از جلد جواب دیجیے گا۔ جزاک اللہ۔

الجوابُ حامِدا ًو مُصلیِّا ً

صورتِ مسؤلہ میں سائلہ کے شوہر كے مذکور جملے "اگر تم نے میرے چچا سے بات کی تو میری طرف سے 2 طلاقیں ہیں" کہہ دینے سے سائلہ پر دو طلاق رجعی معلق ہو چکی ہیں ، اس کے بعد سائلہ نے اپنے شوہر کے چچا کو اگر چہ کال ملائی ہو، لیکن چچا کا کال نہ اٹھانے کی وجہ سے چونکہ سائلہ اور چچا کے درمیان کوئی بات چیت نہیں ہوئی، اس لئےمعلق کردہ دونوں طلاقیں واقع نہیں ہوئیں ،بلکہ دونوں میاں بیوی کا نکاح بدستور برقرار ہے،اور معلق دو طلاقوں کی شرط بھی اپنی جگہ برقرار ہے،اس لئے اگر سائلہ آئندہ کبھی چچا سے بات کرے گی تو اس پردونوں معلق طلاقِ رجعی واقع ہو جائے گی ، جس کے بعد شوہر کو عدت کے اندر رجوع کرنے کا حق حاصل ہوگا،بشرطیکہ اس سے پہلے انہوں نے مزید کوئی طلاق نہ دی ہو، اور ایسی صورت میں آئندہ کے لئے شوہر کو صرف ایک ہی طلاق کااختیار باقی ہوگا، جب کبھی وہ یہ ایک طلاق بھی دیدے گا، تو سائلہ حرمتِ مغلظہ کے ساتھ اپنے شوہر پر حرام ہو جائے گی،اس لئے اس شرط کی خلاف ورزی اور طلاق کے معاملہ میں خوب احتیاط کرنی چاہیے۔

مأخَذُ الفَتوی

كمافي الهندية: ‌ولو ‌قال ‌لها: ‌إن ‌كلمت ‌فلانا فأنت طالق وقال لها أيضا: إن كلمت إنسانا فأنت طالق فكلم فلانا طلقت تطليقتين اھ(الفصل الثالث في تعليق الطلاق بكلمة إن وإذا وغيرهما،ج:١،ص:٤٢٨،ط:ماجدية)
وفي البحرالرائق: وكذلك لو قال إن كلمت فلانا فأنت طالق، وإن كلمت إنسانا فأنت طالق فكلمت فلانا تطلق تطليقتين بحكم اليمينين واليمين لا تنعقد إلا في الملك، ومضافة إلى الملك فإن كانت في ملكه عند دخول الدار صحت اليمين المتعلقة بالكلام فإذا كلمت يقع اھ (باب التعليق في الطلاق، ج: ٤، ص: ٨، ط: رشيدية)
وفي محيط البرھاني: وهو نظير ما لو قال لها: إن كلّمت فلاناً فأنتِ طالق وقال لها أيضاً: إن كلَّمت أنا فأنتِ طالق، فكلّم فلاناً طلقت تطليقتين؛ لأنّه فلان وإنسان اھ(الفصل السابع عشر: في الأيمان في الطلاق، ج: ٣، ص: ٣٩٦، ط: دارالكتب العلمية)