طلاق دیتاہوں تین بار بولنے کا حکم

السلام علیکم! ہم نے کورٹ میرج کی تھی اور نکاح بھی پڑھوایا تھا، 8/9 مہینے ہو گئے ہیں لیکن رخصتی نہیں ہوئی تھی۔ دونوں کے بیچ کچھ غلط فہمی ہو گئی تھی جس کی وجہ سے لڑکے نے فون پر لڑکی کو طلاق دے دی، لیکن ابھی دونوں واپس نکاح کرنا چاہتے ہیں۔ ہمیں دینِ اسلام کی روشنی میں کوئی ایسا راستہ دکھائیں جس سے ہم واپس نکاح کر سکیں۔ جبکہ ہم دونوں کے درمیان صرف خلوتِ صحیحہ ہوئی ہے، ہمبستری نہیں ہوئی۔
نوٹ: طلاق کے الفاظ یہ ہیں: انزیلہ بنت سراج الدین میں آپ کو طلاق دیتا ہوں، طلاق دیتا ہوں، طلاق دیتا ہوں۔

الجوابُ حامِدا ًو مُصلیِّا ً

صورتِ مسئولہ میں اگر خاندانی پس منظر سائل اور مذکور لڑکی اور مالی اعتبار سے دونوں برابر یا لڑکا قدرے بہتر ہو اور یہ نکاح باقاعدہ گواہان کی موجودگی میں ہو ا ہو جیسا کہ سوال میں مذکور ہے تو یہ نکاح شرعاً درست منعقد ہو چکا تھا ،لہذا جب سائل نے اس نکاح و خلوت صحیحہ کے بعد مذکور الفاظ " میں آپ کو طلاق دیتا ہوں " تین مرتبہ فون پر کہہ دیے ، تو ان الفاظ سے اس کی بیوی پر تین طلاقیں واقع ہو کر حرمتِ مغلظہ ثابت ہوچکی ہے، اب رجوع نہیں ہوسکتا اورحلالۂ شرعیہ کے بغیر باہم عقدِ نکاح بھی نہیں ہوسکتا۔جبکہ لڑکی عدت مکمل کرنے کے بعد دوسری جگہ نکاح کرنے میں آزاد ہے۔
اور حلالۂ شرعیہ یہ ہے کہ عورت اپنے شوہر سے علیحد گی اور عدت ِطلاق گزارنے کے بعد بغیر کسی شرط کے کسی دوسرے مسلمان شخص سے نکاح کرے اور حقوق زوجیت ادا کرے، ایسا کرنے سے وہ دوسرے شخص کی بیوی بن جائے گی ، اب اگر وہ دوسرا شخص بھی اس سے ایک مرتبہ ہمبستری (جو کہ حلالۂ شرعیہ کے تحقق کے لئے ضروری ہے) کے فوراً بعد یا ازدواجی زندگی کے کچھ عرصہ بعد طلاق دیدے یا بیوی سے پہلے شوہر کا انتقال ہو جائے ، بہر صورت اس کی عدت گزرنے کے بعد اگر وہ پہلے شوہر کے نکاح میں آنا چا ہے اور پہلا شوہر بھی اس کو رکھنے پر رضامند ہو تو نئے مہر کے تقرر کے ساتھ گواہوں کی موجودگی میں دوبارہ عقد نکاح کر کے باہم میاں بیوی کی حیثیت سے زندگی بسر کر سکتے ہیں، تاہم حلالہ اس شرط کے ساتھ کرنا کہ زوج ثانی نکاح کے بعد طلاق دے تاکہ زوج اول کے لئے عورت دوبارہ حلال ہو جائے ،مکروہِ تحریمی ہے اور احادیثِ مبارکہ میں ایسے عمل کرنے والوں کو ملعون قرار دیا گیا ہے البتہ بغیر شرط کے حلالۂ بلا شبہ جائز اور درست ہے۔

مأخَذُ الفَتوی

كما قال اللہ تعالی: فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ۔( سورۃ البقرۃ،آیت:230)
و فی الھندیۃ: وإذا قال لإمرأتہ أنت طالق و طالق و طالق و لم یعلقہ بالشرط إن کانت مدخولۃ طلقت ثلاثاً و إن کانت غیر مدخولۃ طلقت واحدۃ و کذا إذا قال أنت طالق فطالق فطالق أو ثم طالق ثم طالق أو طالق طالق اھ۔( الباب الثانی فی ایقاع الطلاق ،ج :۱ ،ص :۳۵۵ ،ط: ماجدیہ)۔
و فیہ ایضاً: وإن کان الطلاق ثلاثاً فی الحرۃ و ثنتین فی الامۃ لم تحل لہ حتی تنکح زوجاً غیرہ نکاحاً صحیحاً و یدخل بھا ثم یطلقھا أو یموت عنھا اھ۔ ( فصل فیما تحل بہ المطلقۃ ،ج :۱ ،ص :۴۷۳ ،ط: ماجدیہ) ۔
و فی المبسوط للسرخسی :وإن كان قد خلا بها فطلاقها وعدتها مثل التي دخل بها لأن ‌الخلوة ‌الصحيحة في حكم العدة بمنزلة الدخول ومراعاة وقت السنة في الطلاق لأجل العدة فتقام الخلوة فيه أيضا مقام الدخول.اھ(کتاب الطلاق،ج:6،ص:16،ط:مطبعۃ السعادۃ)