پنج پیری جماعت اہل سنت میں سے ہے یا نہیں؟

کیا فرماتے ہیں علماء دین ومفتیان شرع متین مسئلہ ذیل کے متعلق ،کہ آج کل فرقہ وری کا دور ہے ،ہر طرف لوگ فرقوں میں بٹ گئے ہیں ،جس کی وجہ سے ذہن منتشر اور بے چینی ہو جاتی ہے اور جیسے کہ آج کل ایک فرقے کے بارے میں سنا ہے جو "پنج پیری" کے نام سے مشہور ہے، کوئی کہتا ہے کہ آج کے دور کے علمائے حق ہیں کوئی کہتا ہے کہ یہ فرقہ ضالہ ہے، ان کی بہت ساری تفسیریں ہیں، بعض کہتےہیں کہ ان کی بعض باتیں اجماع امت کے خلاف ہے، ان دنوں ایک فتویٰ دارالعلوم دیوبند کا نظرسے گزرا جس فتوی میں ان کو گمراہ فرقہ کہا گیا ہے اب کہنایہ ہے کہ ہم ان کے بارے میں کیا رائے قائم کریں ،اگر کوئی ہم سے پوچھے ان کے بارے میں تو ہم کیاجواب دیں ۔
اور اس کے ساتھ ساتھ مجھے معتبرعربی اور اردو تفسیر کےکتاب کے حوالے سے رہنمائی فرمائیں کہ میں کون سی کتاب کا مطالعہ کر وں جو عربی میں ہو اور پنچ پیری فرقہ کے بارے میں بھی رہنمائی فرمائیں۔

الجوابُ حامِدا ًو مُصلیِّا ً

اگرچہ مجموعی طور پر یہ جماعت، اہل سنت والجماعت علمائے دیوبند سے منسلک شمار ہوتی ہے، مگر اپنے بعض عقائد و نظریات میں عقائد اہل سنت والجماعت کے اجماعی عقیدوں کے خلاف نظریات رکھنے کی بنا پر راہ اعتدال سے ہٹی ہوئی ہے ،خاص کر یہ لوگ "حیات النبی صلی اللہ علیہ وسلم" کے منکر ہیں ،حالانکہ اہل سنت والجماعت کا عقیدہ ہے کہ نبی کریم صلی اللہ علیہ وسلم اپنے روضہ اطہر میں حیات ہے اور آپ صلی اللہ علیہ وسلم کی یہ حیات مثل حیات دنیاوی، بلکہ اس سے بھی اعلی و ارفع ہے، اس لیے احادیث مبارکہ کی رو سے جو شخص روضہ اطہر کے پاس آپ صلی اللہ علیہ وسلم پر درود پڑھتا ہے ،تو آپ صلی اللہ علیہ وسلم اس کو بذات خود سنتے ہیں اور جواب بھی دیتے ہیں اور جو شخص دور سے درود پڑھتا ہے،اللہ رب العزت فرشتوں کے ذریعہ آپ صلی اللہ علیہ وسلم تک پہنچا دیتے ہیں اور جو شخص اس کے خلاف عقیدت رکھے، وہ اہل سنت والجماعت سے خارج اور بدعتی ہے، مزید تفصیل کے لیے "تسکین الصدور" صفحہ نمبر 219 تا 332 (مؤلفہ شیخ الحدیث حضرت مولانا سر فراز خان صفدر رحمہ اللہ) اور "المہند علی المفنّد" السؤال الخامس (مؤلفہ فخرالمحدثین حضرت مولانا خلیل احمد سہارنپوری قدس اللہ سرہ )کا مطالعہ مفید رہےگا۔
جبکہ مطالعہ تفسیر کیلئےاردوزبان میں "معارف القرآن" مؤلفہ مفتی محمدشفیع عثمانی رحمہ اللہ،اور عربی میں" مختصرتفسیرابن کثیر" کامطالعہ بہتر رہےگا۔

مأخَذُ الفَتوی

كما فی مسند أبی یعلیٰ: عن أنس بن مالك، قال رسول الله صلى الله عليه وسلم: "الأنبياء أحياء في قبورهم يصلون".(ج: 5، ص: 202، مط: دار الحديث - القاهرة)
وفی السنن للامام النسائی رح: عن عبد الله بن السائب ، عن زاذان، عن عبد الله رضي اللہ عنہ قال: قال رسول الله صلى الله عليه وسلم: «إن لله ملائكة سياحين في الأرض، يبلغوني من أمتي السلام». (باب: التسلیم على النبي صلى الله عليه وسلم، ص: 295، رقم الحدیث: 1282، مکتبۃ البشریٰ)
و فی تکملۃ فتح الملھم: و بالجملۃ فإن ھذہ الأحادیث مع حدیث الباب تدل علی کون الأنبیاء أحیاء بعد وفاتھم، و ھو من عقائد جمھور أھل السنۃ و الجماعۃ، إلخ۔ (مسئلۃ حیاۃ الانبیاء علیھم السلام، ج: 5، ص: 30، مط: دار العلوم کراتشی)