شادی سے قبل اپنی مرادنگی چیک کرنے کے لئے کسی غیر عورت سے ہمبستری کرنا جائز ہے؟

کیا فرماتے ہیں علماء کرام اس مسئلے کے بارے میں کہ ایک شخص کی عضوء خاص کے سپاری پرزخم ہے ، اس نے چار یا پانچ جلد کی ڈاکٹروں سے علاج بھی کر وایا ہے، وقتی طور پر کچھ افاقہ ہوجاتا ہے،لیکن مستقل صحت یابی حاصل نہیں ہوئی، گرمیوں میں مرض بڑھ جاتاہے،یہاں تک کہ سپاری پر کپڑا لگ جانے سے بھی بے حد تکلیف ہوتی ہے، ڈاکٹر نے جلد از جلد شادی کرنے کا مشورہ دیا ہے، لیکن اس شخص کو یہ ڈر ہے کہ اگر شادی کے بعد بھی اس کی یہ بیماری صحیح نہیں ہوئی، تو بیوی کی زندگی تباہ ہوجائے گی۔
اس صورت حال میں کیا شریعت میں اس بات کی اجازت ہوسکتی ہے، کہ وہ شخص اپنے آپ کو جاننے کے لیے کہ وہ ازدواجی حقوق پورے کرسکتے ہیں، یا نہیں کسی عورت سے ہمبستری کرے؟ براہ کرم قرآن وحدیث کی روشنی میں رہنمائی فرمائیں، اور اگر اجازت نہیں تو پھر اس پریشانی کا کیا حل ہے؟

الجوابُ حامِدا ًو مُصلیِّا ً

زناء تو بہر حال حرام ہے خواہ اس کو تجربہ کے لیے کیا جائے، یا شہوت سے مغلوب ہو کر جبکہ اسے چاہیے کہ وہ اپنی اس بیماری سے چھٹکارے کے لیے کسی ایسے ماہر ڈاکٹر سے رابطہ کرے اور اس سے علاج کروائے، جو جلد امراض کا علاج کرتا ہو، پھر اگر وہ بھی اس کا علاج کرکے شادی کرنا تجویز کرے تو بلاشبہ شادی کی جاسکتی ہے، اس کے لیے کسی تجربہ کی ضرورت نہیں۔

مأخَذُ الفَتوی

کمافی الدرالمختار: (، ومكروها لخوف الجور) فإن تيقنه حرم ذلك الخ (3/7)۔
و فی ردالمحتار : تحت (قوله: ومكروها) أي تحريما بحر (قوله: فإن تيقنه) أي تيقن الجور حرم؛ لأن النكاح إنما شرع لمصلحة تحصين النفس، وتحصيل الثواب، وبالجور يأثم ويرتكب المحرمات فتنعدم المصالح لرجحان هذه المفاسد بحر الخ (3/7)۔
وفی البحرالرائق: (قوله: وهو سنة، وعند التوقان واجب) بيان لصفته أما الأول فالمراد به السنة المؤكدة على الأصح، (الی قولہ) والمراد بها حالة القدرة على الوطء والمهر والنفقة مع عدم الخوف من الزنا والجور وترك الفرائض والسنن فلو لم يقدر على واحد من الثلاثة أو خاف واحدا من الثلاثة فليس معتدلا فلا يكون سنة في حقه كما أفاده في البدائع الخ (3/85)۔