فرض اور وتر نماز کے بعد اجتماعی دعاء کا حکم

(۱) فرض نماز کے بعد اجتماعی دعا کا حکم تفصیل سے وضاحت کریں۔
(۲) نفل نماز کے بعد اجتماعی دعا کا حکم کیا ہے بعض دیہاتوں میں لوگ کرتے ہیں۔
(۳) رمضان میں وتر کے بعد دعا کرنا صحیح ہے یا نہیں اگر صحیح نہیں تو حکم کیا ہے۔

الجوابُ حامِدا ًو مُصلیِّا ً

(۱) فرض نمازوں کے بعد امام، مقتدی یا منفرد کا دعا کرنا احادیث نبویہ سے ثابت ہے جو کہ سنت مستحبہ ہے پس امام ومقتدی اس سنت پر عمل کریں تو ضمنًا خود بخود اجتماع ہوجائے گا اور یہ جائز ہے ہاں دعا آہستہ مانگنا افضل ہے کیونکہ قرآن وحدیث میں اس کی ترغیب دی گئی ہے اور اگر امام بلند آواز سے دعا کرے اور مقتدی اس پر آمین کہیں تو تعلیماً یہ بھی جائز ہے اور شرعاً اس میں کوئی قباحت نہیں کیونکہ بعد فرائض میں نفس دعا اور دعا میں دونوں ہاتھوں کا اٹھانا۔ آمین کہنا اور دعا کے ختم پر دونوں ہاتھوں کا چہر پر پھیرنا احادیث مبارکہ سے ثابت ہے البتہ مروجہ اجتماعی دعا کہ امام ومقتدی سب مل کر ہی دعا کریں ابتداء بھی ایک ساتھ ہوتی ہو اس طور پر کہ امام یا مؤذن افتتاحی چند کلمات الحمد للہ الخ وغیرہ اونچی آواز سے ادا کرتا ہے اور پھر انتہاء بھی ایک ساتھ ہوتی ہے کہ امام جب دعا ختم کرتا ہے تو ’’برحمتك یا أرحم الراحمین‘‘ بلند آواز سے ادا کرتا ہے جس کی بناء پر مقتدی امام کی دعا کا انتظار کرتے رہتے ہیں اور امام سے پہلے اپنی دعا ختم نہیں کر سکتے ہیں اگر پہلے ختم کریں تو لوگوں میں یہ عمل معیوب سمجھا جاتا ہے بعض مقام پر تو امام کے دعا کے جواب میں بلند آواز سے ’’آمین‘‘ یا دوسرے جوابی کلمات نہ بولنے والے کو بھی نظر حقارت سے دیکھا جاتا ہے اور بعض مقامات پر مقتدی کو اپنی نماز سے فارغ ہو کر امام کی دعا کے انتظار میں بیٹھنا پڑتا ہے۔ یہ سب ایسی باتیں ہیں جن کا شریعت محمدیہ اور سنت نبویہ سے دور کا بھی کوئی تعلق نہیں اور قرون ثلثہ مشہور ولھابالخیر میں کہیں اس کا ثبوت نہیں ملتا اس لئے یہ طریقہ من گھڑت اور خالصۃً بدعت ہے جس سے احتراز واجب ہے۔
خلاصہ یہ ہے کہ دعا میں امام ومقتدی کا اجتماع ایک ضمنی چیز ہے مقصود نہیں لہٰذا اس کو اصل دعا سے بھی مزید بڑھانے کی کوشش کرنا اور ضروری سمجھنا درست نہیں بلکہ امام کو بھی اختیار ہے جتنی دیر چاہے دعا مانگے اور مقتدی کو بھی اختیار ہے اس دعا میں کوئی ایک دوسرے کا تابع نہیں لہٰذا اگر مقتدی چاہے تو مختصر دعا مانگ کر چلا جائے اور چاہے تو امام کے ساتھ دعا ختم کرے اور چاہے تو امام کی دعا سے بھی دیر تک دعا مانگتا رہے ہر طرح جائز ہے اور ان میں سے کسی طرح بھی کرلے تو فرائض کے بعد کی یہ سنت مستحبہ ادا ہو جائیگی۔
(۲) اس نوافل اور وتر کی ادائیگی پر اجتماعی دعا کا ثبوت قرون ثلثہ مشہور ولھا بالخیر سے نہیں اس لیے مذکور موقع پر اس کے اہتمام سے احتراز چاہیے۔

مأخَذُ الفَتوی

فی ابی داؤد: عن السائب بن یذھن ابیه قال كان رسول اللهﷺ اذا دعا رفع یدیه ومسح وجھا بیدیه اھ (ص ۲۱۶ ج ۱)
وفی الترمذی: عن أبی اماسةؓ قال قیل له رسول الله ﷺ أی الدعاء أسمع فقال رسول اللهﷺ جوف اللیل الآخر ودبر الصلوٰة المكتوبات (ص ۱۸۸ ج ۱)
قال فی العرقات: من أصر علی أمر مندوب وجعله غرماً ولم یعمل بالرخصة فقد أصاب منه الشیطان من ضلال فكیف من أصر عملی بدعة او منكر. (ص ۳۱ ج ۳)