معذوربچی کی صحت کے لئے وظیفہ

میری بیٹی کا نام”رمیسہ“ہے، جو کہ چار سال کی ہوگئی ہے، لیکن وہ بہت سخت بیمار ہے اور معذوری کا خطرہ ہے، نہ بول سکتی ہے نہ بیٹھ سکتی ہے، میں بہت پریشان ہوں، پہلے تو آپ سے دعاؤں کی درخواست ہے اور پھر میرے گھر والے کہتے ہیں کہ اس کا نام تبدیل کرتے ہیں کہ نام کا بھی زندگی پر اثر ہوتا ہے تو ان کا کیا نام رکھا جائے اور صحت کے لئے کوئی وظیفہ بھی بتا دیں۔

الجوابُ حامِدا ًو مُصلیِّا ً

اللہ تعالیٰ سائل کی بیٹی کو صحت کاملہ عاجلہ عطاء فرمائے۔ آمین!
اس کے بعد واضح ہو کہ”رمیسہ“کا معنی”جنت کی خوبصورتی“کے آتے ہیں، اس لئے اس نام کے برقرار رکھنے میں کوئی حرج نہیں۔
جبکہ بیماری کا تعلق نام سے نہیں، اچھے ناموں والے بھی تو بیمار ہوتے ہیں، اس لئے سائل کو چاہیے کہ بیٹی کا کسی اچھے معالج سے علاج کروائیں اور روزانہ”سورۂ بنی اسرائیل کی آیت نمبر 82 : ”وَنُنَزِّلُ مِنَ الْقُرْآنِ مَا هُوَ شِفَاءٌ وَّرَحْمَةٌ۔ الخ“ (313) مرتبہ“ صبح و شام اول آخر گیاره گیاره مرتبہ درود شریف پڑھ کربیٹی پر دم کرے اور پانی پر دم کر کے پلاتا رہے ان شاء اللہ بہتری آئیگی۔

مأخَذُ الفَتوی

کما في مشكاة المصابيح: وعن أبي الدرداء قال: قال رسول الله صلى الله عليه وسلم: "تدعون يوم القيامة بأسمائكم وأسماء آبائكم فأحسنوا أسمائكم" رواه أحمد وأبو داود ۔ (2/409)
وفي الشامية: التسمية باسم لم يذكره الله تعالیٰ فی عبادة ولا ذكره رسوله - صلى الله عليه وسلم - ولا يستعمله المسلمون تكلموا فیه، والأولى أن لا يفعل اھ (6/417)