جنات و آسیب سے چھٹکارا پانے کیلئے وظیفہ

السلام علیکم !جناب مفتی صاحب! چند دنوں سے کچھ ایسے کام ہو رہے ہیں، جن سے معلوم ہوتا ہے کہ کوئی آسیب ہے، مثلاً دو مرتبہ فون کی تار غائب ہوگئی، حالانکہ فون کی تار بغیر فون اٹھائے نہیں نکالی جا سکتی، اسی طرح ایک مرتبہ میری والدہ کے کپڑوں میں ایسے سوراخ ہوئے جیسے کسی نے قینچی سے کاٹ دیا ہو، بعد میں ہم نے اس بات کا بھی اطمینان کر لیا کہ کیڑے وغیرہ تو نہیں، مگر وہ بھی نہ تھے، پھر میری بہن کے ساتھ بھی یہی معاملہ ہوا، حالانکہ میری والدہ نے منزل پڑھ کر پانی بھی چھڑکا ہوا تھا، گھر میں TV بھی نہیں، میں خود بھی عالمہ ہوں، برائے کرم میرے سوال کا جواب جلدی دیں۔جزاک اللہ خیراً!

الجوابُ حامِدا ًو مُصلیِّا ً

اس سلسہ میں اصل وظیفہ رجوع الی اللہ، فرائض و واجبات کی پابندی، اتباعِ سنتِ نبویﷺ اور منکرات، فواحشات اور ہر قسم کی معصیات و گناہوں سے اجتناب اور صبح و شام کے وظائف و اوراد کا اہتمام ہے، نیز ہر نماز کے بعد”آیۃ الکرسی“ پڑھنے سے امید ہے کہ مذکور پریشانی اور الجھن سے ضرور چھٹکارا حاصل ہو گا اور اگر اس کے ساتھ سا تھ متبع شریعت، متقی و پرہیزگار عامل سے رجوع کر کے اس کے بتلائے ہوئے اعمال بھی اختیار کر لیے جائیں، تو یہ عمل بھی مفید ثابت ہوگا۔