السلام علیکم!
کیا یہ صحیح ہے کہ حضور پاکﷺ ذکر و اذکار میں سے کبھی کوئی عمل کرتے تھے اور کبھی کوئی یا کچھ عمل مسلسل کرتے تھے اور بعض جیسے بے پناہ ثواب والے اعمال ہیں وہ کبھی کبھار کرتے تھے، جیسے کہ ”عمل مختصر ثواب زیادہ“ کتاب ہے اور مستند ”مجموعہ وظائف“ میں جو بے پناہ ثواب والے اعمال ہیں، کیا حضور پاکﷺ وہ روزانہ پڑ ھتے تھے، ایک جگہ میں نے پڑھا تھا کہ حضور پاکﷺ کبھی کوئی دعائیں پڑھتے تھے تو کبھی کوئی۔
نبی اکرم ﷺ سے موقع محل کی مناسبت سے مختلف اذکار اور دعائیں منقول ہیں، لیکن با قاعدگی سے کسی مخصوص ذکر پر ایک خاص وقت میں مداومت اختیار کرنے کے متعلق کوئی روایت ہماری نظر سے نہیں گزری، جبکہ اذکار و اوراد کی مختلف کتب میں ذکر واذکار کی جو ترتیب ذکر کی گئی ہے، وہ صحابۂ کرام - رضوان اللہ علیہم اجمعین - یا بزرگانِ دین کے معمولات کے مطابق ذکر کی گئی ہے۔