ڈنمارک میں مشین کے ذریعہ ذبح کی گئی مرغی کا حکم

جناب السلام علیکم
امید ہے کہ آپ بخیریت ہوں گے،مجھے حلال طریقے کے متعلق جاننا ہے،مسئلہ یہ ہے کہ سویڈن کے بہت سے مسلمان وہ مرغی کھاتے ہیں،جو ڈنمارک کی ایک کمپنی انہیں فروخت کرتی ہے،جو کہتے ہیں کہ ان کی مرغی حلال ہے،وہی مرغی یہاں کے میکڈونلڈز میں بھی استعمال ہوتی ہے، اور بہت سارے دیگر مسلمان وہی مرغی کھاتے ہیں اور اسے حلال سمجھتے ہیں،لیکن میری پریشانی یہ ہے کہ جس طریقے سے وہ ذبح کرتے ہیں،کیا وہ حلال ہے،ان کی ویب سائٹ میں جو حلال کا طریقہ لکھا ہوا ہے،وہ یہ ہے،سب سے پہلے مرغیاں الیکٹرک شاک سے بےہوش کی جاتی ہیں،جو مسلمان بندہ وہاں کام کرتا ہے،وہ دعا پڑھتا ہے ذبح کے شروع میں , اور ہر وقت ذبح کرنے اور بسم اللہ پڑھنے میں کچھ فاصلہ ہوجاتا ہے،کیا یہ حلال ہے؟اور شروع میں ایک مرتبہ بسم اللہ پڑھنے سے حلال ہوجائے گا؟خلاصہ یہ کہ یہ مرغیاں ہمارے لئے حلال ہوں گی یاحرام؟ اور یہ کمپنی بہت سارے مسلمان ملکوں کو یہ مرغیاں سپلائی کرتی ہے،تو ہم کیا کریں؟

الجوابُ حامِدا ًو مُصلیِّا ً

اگر یہ مشینی ذبیحہ ایسا ہوکہ ایک چین پٹی کے ذریعہ مرغیوں کو محض قابو کرکے یکے بعد دیگرے انہیں ذابح کے سامنے سے گزارا جاتا ہو اور وہ ہر مرغی کو بسم اللہ پڑھ کر ذبح کرتا ہو تو ایسی مرغی کا کھانا بلاشبہ جائز ہے،جبکہ اس کے علاوہ جو مرغیاں محض مشین کے ذریعہ ذبح کی جاتی ہیں،اس طور پر کہ مشین کے ذریعہ انہیں قابو کیا جاتا ہو اور مسلسل چلنے والے ایک بلیڈ کے ذریعہ انہیں ذبح کیا جاتا ہو اور ذبح کرنے والا محض مشین کا بٹن دبانے کا کام کرتا ہو،تو ایسی مرغی کا کھانا شرعاً جائز نہیں،اس سے احتراز لازم ہے،پھر ڈنمارک جو غیر مسلم ملک ہے،جنہیں حلال وحرام کی تمیز ہی نہیں،اسلئے ان کے ذبیحہ کو بلاتحقیق کھانے سے احتراز چاہیئے۔

مأخَذُ الفَتوی

کمافی البحر الرائق: وفی الحاوی جمع العصافیر فذبح واحدة وسمی وذبح اخری علیٰ اثرہ بتلك التسمیةلاتؤکل ولو امرالسکین علیھم بتسمیة واحدة جاز اھ(8/169)۔