روزہ کی حالت میں ناک میں اسپرے ڈالنے کا حکم

السلام علیکم! میری ناک کی ہڈی ٹیڑھی ہے اور ٢٠٠٦ میں آپریشن بھی ہوا تھا اس کے بعد بھی مسئلہ حل نہیں ہوا میری ناک 4,5 چار پانچ گھنٹے کے بعد بند ہو جاتی ہے اگر زینو سین اسپرے نہ ڈالوں سانس لینے میں دشواری ہوتی ہے اور سر میں شدید درد ہوتا ہے ، روزے کی حالت میں کیا کروں بہت پریشان ہوں میری عمر ٣٦ سال ہے رہنمائی کریں ۔

الجوابُ حامِدا ًو مُصلیِّا ً

واضح ہو کہ " اسپرے " میں چونکہ دوا کے ذرات ہوتے ہیں اس لئے روزہ کے دوران اس کے استعمال سے روزہ ٹوٹ جاتا ہے ، لہٰذا سائل کو چاہیئے کہ " مذکور اسپرے " کو سحری اور افطاری کے وقت استعمال کا معمول بنائے ، تاہم اگر مرض شدید ہونے کی وجہ سے سانس لینے میں اس قدر دشواری کا سامنا ہو کہ سحری اور افطاری میں استعمال پر اکتفاء نہ ہوسکے بلکہ بیماری سے افاقے کے لئے دن میں بھی اسپرے کی ضرورت درپیش ہو تو ایسی صورت میں سائل کے لئے روزے نہ رکھنے کی اجازت ہے ، تاہم بعد میں جب مرض سے افاقہ ہو تو چھوٹے ہوئے روزوں کی قضاء سائل کے ذمہ لازم ہوگی ، لیکن اگرمستقبل میں بھی مذکور بیماری سے افاقے کی امید نہ ہو اور اس بیماری کے دوران روزے رکھنے میں سخت دشواری کا سامنا ہو تو ایسی صورت میں سائل کے ذمہ ہر روزے کے بدلے صدقہ فطر کے بقدر فدیہ دینا لازم ہوگا۔

مأخَذُ الفَتوی

کما فی المحیط البرھانی : وإذا استعط، أو أقطر في أذنه، إن كان شيئاً يتعلق به صلاح البدن، نحو الدهن والدواء يفسد صومه من غير كفارة، وإن كان شيئاً لا يتعلق به صلاح البدن كالماء قال مشايخنا: ينبغي أن لا يفسد صومه، إلا أن محمداً رحمه الله: لم يفصل بينما يتعلق به صلاح البدن، وبينما لا يتعلق.اھ ( کتاب الصوم ، الفصل الرابع فیما یفسد الصوم و مالا یفسد الصوم ، ج۲ ، ص۳۸۳ ،ط۔دارلکتب العلمیۃ )۔
و فی الھندیۃ : (ومنها المرض) المريض إذا خاف على نفسه التلف أو ذهاب عضو يفطر بالإجماع، وإن خاف زيادة العلة وامتدادها فكذلك عندنا، وعليه القضاء إذا أفطر كذا في المحيط. ثم معرفة ذلك باجتهاد المريض والاجتهاد غير مجرد الوهم بل هو غلبة ظن عن أمارة أو تجربة أو بإخبار طبيب مسلم غير ظاهر الفسق كذا في فتح القدير. والصحيح الذي يخشى أن يمرض بالصوم فهو كالمريض هكذا في التبيين الخ ( کتاب الصوم ، الباب الخامس فی الأعذار ، ج۱ ، ص۲۰۷، ط۔ماجدیہ )۔
وفی التاتارخانیۃ : إذا وجب علی الرجل القضاء بأن أفطر بعذر أو بغیر عذر ، ولم یقض ، حتی عجز و صار شیخا فانیاً ، بحیث لا یرجی برؤہ یجوز لہ الفدیۃ ( إلی قولہ ) و یجوز فیھا ما یجوز فی صدقۃ الفطر الخ (کتاب الصوم ، الفصل السابع فی الأسباب المبیحۃ للفطر ، ج۳ ، ص۴۰۹ ، ط۔رشیدیہ )۔