روزے میں حیض آنے کی صورت میں کھانے پینے اور فدیہ ادا کرنے کا حکم

السلام علیکم ورحمۃ اللہ وبرکاتہ!
میرے مفتی صاحب سے دو سوالات ہیں براہ مہربانی راہنمائی فرمائیں ۔
1۔روزے کی حالت میں اگر حیض آ جائے تو کیا عورت کھا پی سکتی ہے؟
2۔میری خالہ نے تقریباً کبھی بھی روزے نہیں رکھے ۔ اور فدیہ بھی ادا نہیں کیا ۔پہلے تو کوئی بیماری نہیں تھی مگر کچھ عرصہ سے diabetes ہوگئی ہے،خود وہ کوئی کام نہیں کر تی ہیں لیکن والد کی پینشن مل جا تی ہے ان کو ۔ کیا ان پر روزوں کا فدیہ دینا فرض ہے ؟ اور جو پہلے کے روزے ہیں جن کا فدیہ ادا نہیں کیا ان کا کیا فدیہ ادا کرنا ہوگا ۔

الجوابُ حامِدا ًو مُصلیِّا ً

عورت کو روزے کی حالت میں ماہواری آنے کی صورت میں اس کا روزہ فاسد ہو جاتا ہے ، جس کے بعد اس کے لئے تنہائی میں کھانا پینا بھی جائز ہے ، البتہ اس ایک دن کے روزہ کی قضا کرنا اس پر لازم ہوگی ، جبکہ سائلہ کی خالہ کا صحت و تندرستی کے باوجود روزہ نہ رکھنا درست نہ تھا، جس کی وجہ سے وہ سخت گناہ گار ہوئی ہے، انہیں اپنی اس غفلت پر بصدقِ دل توبہ و استغفار کرنا لازم ہے، تاہم اب اگر سائلہ کی خالہ کو مذکور بیماری (Diabetes) لاحق ہونے کی وجہ سے روزہ رکھنے پر قدرت نہ ہو، یا روزہ رکھنے سے بیماری کے بڑھنے کا اندیشہ ہو اور مسلمان ماہر ڈاکٹر بھی روزہ نہ رکھنے کا مشورہ دیتے ہوں ،نیز تادمِ مرگ انہیں اس بیماری سے صحت یابی کی امید بھی نہ ہو، تو ایسی صورت میں ان کے لئے فی روزہ ایک صدقہ فطر (جو پونے دو سیر اور احتیاطاً دو سیر گندم) یا اس کی قیمت فقراء کو فدیے میں دینا لازم ہے ۔

مأخَذُ الفَتوی

وفی ردالمحتار: تحت (قوله وصوما) أي يحرمه ويمنع صحته لا وجوبه فلذا تقضيه اھ (کتاب الطھارۃ ج1 صـ 291 ط: سعید)-
وفی بدائع الصنائع: ولو حاضت المرأة ونفست بعد طلوع الفجر فسد صومها لأن الحيض، والنفاس منافيان للصوم لمنافاتهما أهلية الصوم شرعا الخ (کتاب الصومج 2 صـ 294 ط: دار الکتب العلمیۃ)-
وفی رد المحتار: قوله وللشيخ الفاني) أي الذي فنيت قوته (إلی قولہ) المريض إذا تحقق اليأس من الصحة فعليه الفدية لكل يوم من المرض اھ (کتاب الذصوم ج 2 صـ 427 ط: سعید)-
وفی الھندیۃ: (ومنها المرض) المريض إذا خاف على نفسه التلف أو ذهاب عضو يفطر بالإجماع، وإن خاف زيادة العلة وامتدادها فكذلك عندنا الخ (کتاب الصوم ج 1 صـ 207 ط: سعید)-