السلام علیکم ورحمۃ اللہ و برکاتہ ؛ بعد سلام مسنون قابلِ رہبری مسئلہ یہ ہے کہ میں ایک دیہات کا رہائشی ہو ں ،نیز وہاں کا امام بھی ہوں،میرے نام پر والد صاحب نے 3 لاکھ روپے کسی کاروبار میں انویسٹ کیے ہیں تاکہ اس سے چند ہزار انکم حاصل ہوکر اس پر گزر بسر ہو، مذکورہ رقم میرے نام کرنے کی کیفیت یہ تھی کہ مذکورہ رقم پہلے بڑے بھائی کے نام مذکورہ کاروبار میں انویسٹ کی،لیکن جب انکو وہاں کوئی خاص فائدہ سامنے نہ آیا تو اس کے بعد والد صاحب نے مذکورہ رقم لوٹانے کے بجائے زبانی کلامی طور پر میرے نام کر ڈالا،مذکورہ کاروبار کا مالک مجھے میرے حصہ سرمایہ سے پہلے بھی ماہانہ اپنی طرف سے تبرعاً چند ہزار رقم دیا کرتے تھے ،اور پھر والد صاحب کا مذکورہ رقم میرے نام کرنے کے بعد بھی وہی ماہانہ وظیفہ میرے نام مالکِ کاروبار دیتا رہا اور ابھی تک دے رہا ہے ،لیکن میرا نام اب شرکاء میں شمار ہے ،جس کی وجہ سے بظاہر مجھ پر قربانی لازم ہورہی ہے جسکا مجھ میں استطاعت نہیں ،نیز والد صاحب نے جو پیسہ میرے نام کیا ہے اسکی کیفیت یوں ہے کہ اگر مذکورہ رقم والد صاحب دوبارہ لینا چاہے وہ مکمل با اختیار ہوتا ہے، کیونکہ جن بھائیوں کے نام پر والد نے رقم انویسٹ کی ہیں ، کبھی کبھار کسی بھائی کو غصے میں آکر یہ بھی کہہ دیتے ہیں کہ مثلاً ٹھیک ٹھیک رہو ورنہ سارا حصہ واپس لے لونگا وغیرہ اس جیسی باتیں غصے میں کہہ دیتے ہیں جس سے شک سا ہوتا ہے کہ بچوں کے نام یہ ملکیت تام نہیں ،کیا اس جیسی ملکیت میں مجھ پر قربانی و زکوۃ کے احکام لاگو ہونگے کہ نہیں؟ براہِ کرم جلد از جلد رہنمائی فرمائیں تاکہ قربانی کے حکم سے سبکدوش ہو سکوں ۔ واجرکم علی اللہ.
واضح ہو کہ کسی شخص کی اپنی ذاتی ملکیت میں موجود چیز کا بلا معاوضہ کسی دوسرے شخص کو مالک بنانا شرعاً ہبہ ( گفٹ) کہلاتا ہے، اور ہبہ ( گفٹ) کے تام ہونے کے لئے ضروری ہے کہ واہب موہوبہ چیز کو موہوب لہ کے نام کرنے کے ساتھ اس سے اپنا قبضہ اور تصرف مکمل طور پر ختم کرکے دوسرے کے حوالہ کر دے۔
لہذا سائل کے والد نے مذکورہ رقم اگر فقط سائل کے نام کی ہو اس طور پر کہ اس سرمایہ سے ملنے والا فقط نفع سائل کو ملتا ہو، باقی اصل سرمایہ والد ہی کی ملکیت میں ہو، کہ وہ اسے جب دوبارہ لینا چاہے اس میں مکمل با اختیار ہو، تو ایسی صورت میں سائل چونکہ اس سرمایہ کا مالک نہیں بنا ، بلکہ وہ رقم بدستور والد ہی کی ملکیت ہے،اس لئے اس رقم کی وجہ سے سائل صاحبِ نصاب نہیں ہوگا، اگر سائل کے پاس مذکورہ رقم کے علاوہ دیگر اموالِ زکوۃ میں سے نصاب کے بقدر کوئی مال موجود نہ ہو، تو سائل پر زکوۃ و قربانی لازم نہیں ہوگی۔
کما فی الھندیۃ: و منھا ان یکون الموھوب مقبوضاً حتی لا یثبت الملک للموھوب لہ قبل القبض الخ ( کتاب الھبۃ، ج: 4، ص: 374، ط: ماجدیۃ )۔
و فی التاترخانیۃ: الھدایۃ: الزکاۃ واجبۃ علی الحر العاقل البالغ المسلم اذا بلغ نصاباً الخ (کتاب الزکاۃ، ج: 3، ص: 133، ط: رشیدیۃ)۔
و فی رد المحتار: تحت: ( قولہ و الیسار ) بان ملک مائتی درھم أو عرضاً یساویھا غیر مسکنہ و ثیاب اللبس أو متاع یحتاجہ الی أن یذبح الاضحیۃ الخ ( کتاب الاضحیۃ، ج: 6، ص: 312، ط: سعید )۔