اگر کسی شخص نے قربانی کے جانور کے پیسہ بھیجے ہوں اور کہا کہ اس سے آپ ایک جانور خرید لیں اور خریدنے والے نے اس کو ڈھونڈا اور خریدا اس نے بیوپاری سے 110000 (ایک لاکھ دس ہزار) کا جانور 100000 (ا یک لاکھ) کا خریدا اور پیسے بھیجنے والے نے 110000 بھیجے تھے،تو جو باقی کے دس ہزار بچ گئے ہیں، وہ انکو اپنے پاس رکھ سکتا ہے ؟ انکو استعمال کرنا جائز ہے یا ناجائز ؟
صورتِ مسئولہ قربانی کا جانور خریدنے والا شخص اگر قربانی کرنے والے کی طرف سے بطورِ وکیل یہ جانور خرید رہا تھا تو اس صورت میں مذکور بچ جانے والے دس ہزار روپیہ اس کے پاس امانت تھے جسے مؤکل کے علم میں لائے بغیر اپنے پاس رکھنا اور استعمال میں لانا خریدار (وکیل ) کے لئے جائز نہیں جس سے احتراز لازم ہے ۔
کما قال اللہ تعالی: ان اللہ یأمرُ کم أن تؤدّوا الامٰنٰتِ الی اھلھا الآیۃ (سورۃ النساء آیت: 58)۔
و فی احکام القرآن للجصاص: قال ابو بکر مااؤتمن علیہ الإنسان فھو امانۃ فعلی المؤتمن علیھا ردّھا الی صاحبھا فمن الامانات الودائع و علی مودعیھا ردّھا الی من اودعہ ایّاھا الخ (ج: 2، صـ: 207، ط: سہیل اکیڈمی)۔
و فی شرح المجلۃ: المال الذی قبضہ الوکیل بالبیع و الشراء و ایفاء الدین و استیفاء و قبض العین من جھۃ الوکالۃ ھو فی حکم الودیعۃ فی یدہ فاذا تلف بلا تعد و لا تقصیرٍ فلا یلزم الضمان الخ (کتاب الوکالۃ، ص: 390، ط: دار ابن حزم)۔