پیٹرول کوپن فروخت کرنے کا حکم

السلام علیکم!
میں دراز ایپ سے پیٹرول کے کو پن خریدتا ہوں، جس پر مجھے بینک کی طرف سے 10 فیصد ڈسکاؤنٹ ملتا ہے، میں خرید کر پیٹرول استعمال نہیں کرتا ،میں کوپن اپنے بھائی کو دے کر پیسے لے لیتا ہو، جس پر مجھے 500 روپے بچتے ہیں، تو کیا اس طرح کرنا جائز ہے یا نہیں؟ کیونکہ میں پیٹرول استعمال نہیں کرتا ،میرا بھائی پمپ پر کیشئر ہے، جس کی مدد سے میں وہ کو پن کیش کروالیتا ہوں تو یہ کیش لینا جائز ہے یا نہیں ؟ جبکہ کو پن کی مالیت 5000 ہزار روپے ہے ،میں ایک کارڈ کے ذریعہ خریدتا ہوں ، مجھے 4500 روپے کا پڑتا ہے جس پر مجھے 500 روپے بچ جاتے ہیں، واضح رہے کہ اس کو پن کا حال جو بھی ہو وہ اس کے ذریعہ پٹرول پمپ سے اپنے لئے بھی تیل ڈلو اسکتا ہے، جس کا طریقہ یہ ہے کہ پمپ والے اس کو پن کا کوڈ محفوظ کر لیتے ہیں اور بعد میں وہ ’’ در از ایپ‘‘ والوں سے طے شدہ طریقہ کار کے مطابق وصولی کر لیتے ہیں۔

الجوابُ حامِدا ًو مُصلیِّا ً

سائل کا در از ایپ سے بینک کے توسط سے پانچ ہزار کی مالیت کا پیٹرول کو پن دس فیصد ڈسکاؤنٹ کیساتھ ساڑھے چار ہزار روپے میں خرید کر اس کے ذریعے پیٹرول پمپ سے پیٹرول لینے کے بجائے محض کوپن کو پانچ ہزار روپے میں فروخت کرنا شرعاً جائز نہیں، جس سے احتراز لازم ہے، تاہم مذکور کوپن کے ذریعے پیٹرول وصول کرنے کے بعد کسی کو فروخت کر کے نفع حاصل کرلے تو شرعاً اس کی اجازت ہوگی۔

مأخَذُ الفَتوی

کمافی صحیح مسلم: عن ابی ھریرۃ۔رضی اللہ عنہ۔انہ قال لمروان: احللت بیع الربا،فقال مروان مافعلت؟ فقال ابوھریرۃ احللت بیع الصکاک،وقد نھی عن بیع الطعام حتیٰ یستوفی،قال فخطب مروان الناس فنھیٰ عن بیعھا اھ(2/4)۔
وفی تکملۃ فتح الملھم: قولہ(احللت بیع الصکاک) فی المنتقی(الصکوک الرقاع مکتوب فیھا اعطیات الطعام وغیرھا مما تعطیہ الامراء للناس) وقد دل حدیث الباب علیٰ حرمۃ بیع الصکاک لکونہ بیعا قبل القبض او بیع مالیس عند الانسان ولان العطاء لایملکہ صاحبہ الا بعد قبضہ وغایۃ مافی الباب ان یکون دینا مستحقا علیٰ بیت المال وبیع الدین من غیر من علیہ الدین لایجوز وھو مذھب الحنفیۃ اھ(1/360)۔