السلام علیکم مفتی صاحب!ایک مسئلہ معلوم کرنا تھا:ہم اجتماعی قربانی کے لیے فی حصہ 30 ہزار روپے وصول کرتے ہیں۔ بعض اوقات ہم جانور کم قیمت میں خرید لیتے ہیں، مثلاً مجموعی لاگت کے حساب سے فی حصہ تقریباً 20 ہزار بنتا ہے، لیکن شرکاء سے پہلے سے طے شدہ 30 ہزار ہی لیتے ہیں۔ باقی رقم انتظامات، محنت یا منافع کی صورت میں ہمارے پاس رہتی ہے۔
کیا اس طرح اجتماعی قربانی کرنا جائز ہے؟
اور کیا اجتماعی قربانی کا انتظام کرنے والا اپنی خدمت یا انتظام کے بدلے کوئی کمیشن / منافع رکھ سکتا ہے؟
اگر جائز ہے تو اس کی شرعی حدود اور درست طریقہ کیا ہونا چاہیے؟جزاکم اللہ خیراً
واضح ہو کہ لوگوں کی طرف سے اجتماعی قربانی کا اہتمام کرنے والے ادارے یا افراد بحیثیتِ مجموعی حصہ داروں کی طرف سے وکیل ہوتے ہیں ،اور ان پر اس معاملہ میں وکالت ہی کے احکام لاگو ہوں گے ،لہذا صورت مسئولہ میں سائل کے پاس جانور خریدنے اور ذبح وکٹائی وڈسٹری بیوشن کے اخراجات نکالنے کے بعد جو رقم بچتی ہے وہ شرعاً اصل مالکان کی ہی ہوتی ہے،اور اگر ابتدا ہی سے سائل نے اپنے اس عمل اور تگ ودو کی باقاعدہ اجرت متعین نا کی ہو تو اب سائل کے لیے اس اضافی بچی ہوئی رقم کو اپنے پاس رکھنا شرعاً جائز نہیں ہوگا، بلکہ مالکان کو واپس کرنا لازم ہوگا۔
کمافی الدر المختار(وإن) بشراء شيء (بغير عينه فالشراء للوكيل إلا إذا نواه للموكل) وقت الشراء (أو شراه بماله) أي بمال الموكل،
و فی الرد: تحت (قولہ فالشراء للوکیل الخ) و حاصلھا انہ إن أضاف العقد إلی مال أحدھما کان المشتري لہ و إن أضافہ إلی مال مطلق فإن نواہ للآمر فھو لہ و إن نواہ لنفسہ فھو لہ (الیٰ قولہ) و بہ علم أن محل النیة للموٴکل فیما إذا أضافہ إلی مال مطلق سواء نقدہ من مالہ أو من مال المؤکل الخ(باب الوکالۃ بالشراء،ج:5،ص:518،مط:ایچ ایم سعید)
وفی درر الحکام شرح مجلۃ الاحکام: (إذا شرطت الأجرة في الوكالة وأوفاها الوكيل استحق الأجرة، وإن لم تشترط ولم يكن الوكيل ممن يخدم بالأجرة كان متبرعا. فليس له أن يطالب بالأجرة) يستحق في الإجارة الصحيحة الأجرة المسمى. وفي الفاسدة أجر المثل(المادة :1467 ،ج:3،ص:573،مط: دار الجيل)