سفرِ شرعی کی نیت سے ، گاؤں سے نکلتے وقت ، احکامِ سفر شروع ہونے کی ابتداء اور واپسی پر انتہاء کی حدود

السلام علیکم و رحمۃ اللہ و برکاتہ! ہمارا ضلع شمالی وزیرستان ہے ، جس کے اندر ہمارا وطنِ اصلی علاقہ "مائزر " ہے، اس "مائزر " سے تقریباً ۲ کلومیٹر یا ساڑھے دو/ ۲ کلومیٹر کے فاصلہ پر ایک گاؤں ہے ، جس کا نام "شیرنی" ہے ، اسی "شیر نی" میں ہمارا قبرستان ہے ، جس میں ہم اپنے مردے دفن کرتے ہیں ، تواب حل طلب بات یہ ہے کہ جب ہم سفر پر جاتے ہیں تو ہم نماز میں قصر کہاں سے شروع کریں ؟ اپنے گاؤں "مائزر " کے گھروں اور آبادی سے گزر کر یا اس گاؤں "شیرنی" کے آبادی اور گھروں سے گزر کر ، جس میں ہمار اقبرستان ہے اور پھر سفر سے واپسی پر ہم اتمامِ نماز کہاں سے کریں ؟ گاؤں "شیرنی" کے حدود میں داخل ہو کر ، یا پھر اپنے گاؤں "مائزر" کے آبادی میں داخل ہو کر؟

الجوابُ حامِدا ًو مُصلیِّا ً

سائل جب مسافتِ سفر کے بقدر ( ۷۸ کلومیٹر یا اس سے زائد ) سفر کی نیت کرکے اپنے گاؤں" مائزر " کے حدود سے نکلے گا ، توشرعاً سائل مسافر شمار ہو گا ، لہٰذا گاؤں "مائزر" کے حدود سے نکلتے ہی نماز میں قصر کرنا لازم ہے اور اسی طرح جب سفر سے واپسی ہو ، تو اپنے گاؤں "مائزر" کے حدود میں داخل ہونے پر اقامت کے احکام جاری ہونگے۔

مأخَذُ الفَتوی

فی بدائع الصنائع : و أما بیان ما یصیر به المقیم مسافراً فالذی یسیر المقیم به مسافراً نیة مدة السفر و الخروج من عمران المصر اھ (۱/۹۳)۔
و فی الدر المختار : (من خرج من عمارة موضع إقامته) من جانب خروجه و إن لم يجاوز من الجانب الآخر . و في الخانية : إن كان بين الفناء و المصر أقل من غلوة و ليس بينهما مزرعة يشترط مجاوزته و إلا فلا اھ و فی حاشية ابن عابدين : و أما الفناء و هو المكان المعد لمصالح البلد كركض الدواب و دفن الموتى و إلقاء التراب ، فإن اتصل بالمصر اعتبر مجاوزته و إن انفصل بغلوة أو مزرعة فلا اھ(2/ 121)۔