اکابرِ امت پر نازیبا الزامات لگانے والے کے پیچھے نماز کا حکم

کیا فرماتےہیں علماء ِکرام و مفتیانِ عظام اس مسئلہ کے بارے میں کہ اگر ایک عالم تحریری یا تقریری طور پر امام اعظم ابوحنیفہؒ پر شرک اور علم الغیب کا الزام لگاتے ہیں اور دعوت تبلیغ کو ایک الگ مذہب اور مسلک قرار دیتے ہیں اور تبلیغی جماعت پر یہ الزام لگاتے ہیں کہ تبلیغی جماعت کے لوگ حلال کو حرام اور حرام کو حلال قرار دیتے ہیں اور تبلیغی جماعت کو قرآن کا دشمن قرار دیتے ہیں اور تبلیغی حضرات پر جہاد کے انکار کے الزام لگاتے ہیں اور علامہ رشید احمد گنگویؒ اور شیخ الحدیث محمد زکریاؒ پر یہود اور نصاریٰ کافتویٰ لگاتے ہیں، کہ وہ یہودی تھےیا نصاریٰ، ایسے شخص کے بارے میں آپ لوگوں کی کیا رائے ہے؟ اور ان کی اقتداء کرنے والوں کو کیا کہیں گے؟ وضاحت فرمائیں۔

الجوابُ حامِدا ًو مُصلیِّا ً

اسلافِ امت کی شان میں لب کشائی بلاشبہ فسق ہے اور بلاتحقیق تبلیغی جماعت کے بارے میں بلاوجہ کی الزام تراشی جہالت پر مبنی ہے، اس لیے مذکور امام موصوف جب تک اپنی ان ناجائز حرکتوں اور امورِ فسق سے برأت کا اعلان کر کے اپنی لب کشائی پر توبہ و استغفار نہ کرے، اس وقت تک اس کی اقتداء میں نماز پڑھنا مکروہ تحریمی ہے، تاہم مذکور عالم موصوف کی متعلقہ تحریر اور علمی اشکالات لکھ کر سوال دوبارہ بھیج دیا جائے تو اس پر مزید غور کیا سکتا ہے۔

مأخَذُ الفَتوی

قال اللہ تعالیٰ: ﴿وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا ﴾ (الأحزاب: 58)
و فی حاشية ابن عابدين: وأما الفاسق (إلی قوله) كالمبتدع تكره إمامته بكل حال، بل مشى في شرح المنية على أن كراهة تقديمه كراهة تحريم الخ (1/ 560) واللہ أعلم بالصواب!