پریشانیوں سے نکلنے کا وظیفہ

میں بہت بڑی مشکل میں ہوں۔ آمدنی کے تمام ذرائع بند ہو چکے ہیں اور مجھ پر بہت زیادہ قرض ہے۔ میں حالات بہتر کرنے کی کوشش کر رہا ہوں، لیکن مجھے صورتحال سدھارنے کی کوئی راہ نظر نہیں آتی۔ میری عمر بڑھ رہی ہے مگر شادی کا کوئی ذریعہ نظر نہیں آ رہا۔ان تمام وجوہات کی بنا پر میرے ذہن پر بہت زیادہ دباؤ اور تناؤ (اسٹریس) ہے، اور میری کسی کام میں دلچسپی نہیں رہی، یہاں تک کہ لوگوں سے ملنے کو بھی دل نہیں چاہتا۔براہ کرم تمام آفات اور مالی مسائل دور کرنے کے لیے کچھ مفید دعائیں (اذکار) تجویز کریں جو زندگی میں خوشحالی اور برکت لائیں...

الجوابُ حامِدا ًو مُصلیِّا ً

واضح ہو کہ پریشانی کا اصل علاج رجوع الی اللہ اور اتباع سنت میں مضمر ہے، اس لئےاولا تو سائل کو چاہئے کہ وہ اپنے اعمال و افعال کو بموافق سنت نبوی ڈھالنے کی کوشش کرلے، اگر اس کے ساتھ ساتھ درج ذیل وظائف کی بھی پابندی کرے انشاء الله رزق میں بہتری اور فراخی ہوگی۔۱.﴿وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا ﴾ (الطلاق،آیت: 3 )فراخی رزق کےلیے اور جس مہم میں چاہے اس کو صبح شام سو مرتبہ پڑھا کرے۔۲. جبکہ درج ذیل آیات کاغذ پر لکھ کر بازو پر باندھ دیا جائے تو باکار ہو جائے۔﴿قُلْ إِنَّ الْفَضْلَ بِيَدِ اللَّهِ يُؤْتِيهِ مَنْ يَشَاءُ وَاللَّهُ وَاسِعٌ عَلِيمٌ، يَخْتَصُّ بِرَحْمَتِهِ مَنْ يَشَاءُ وَاللَّهُ ذُو الْفَضْلِ الْعَظِيمِ﴾ (آل عمران: 73، 74) ۔(اعمال قرآنی صفحہ:۷۳)
البتہ رشتے اور شادی کا جو وقت من جانب اللہ مقرر ہے، اس وقت پر ان شاء اللہ ضرور ہو گا، سائل کو چاہئے رشتے کا انتخاب اپنے والدین کے سپرد کر دیں، یہ سائل کے حق میں ان شاء اللہ بہتر رہے گا، نیز پنج وقتہ نماز کی پابندی کے ساتھ ساتھ قرآن کریم کی تلاوت کا بھی اہتمام کریں اور درج ذیل عمل بھی کریں، ان شاء اللہ اپنی مراد میں جلدی کامیابی حاصل کر سکیں گے۔”سورۂ طٰہٰ“ کی آیت نمبر(۱۳۱/۱۳۲) ” {وَلَا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ وَرِزْقُ رَبِّكَ خَيْرٌ وَأَبْقَى ، وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا لَا نَسْأَلُكَ رِزْقًا نَحْنُ نَرْزُقُكَ وَالْعَاقِبَةُ لِلتَّقْوَى} [طه: ۱۳۱، ۱۳۲] “لکھ کر اپنے دائیں بازو پر باندھ لیں اور اللہ تعالیٰ سے دعا بھی کرتے رہیں۔(اعمال قرآنی )