کیا روزہ نہ رکھنے والے کے لئے کھانے پینے کا انتظام کرنا جائز ہے؟

کیا فرماتے ہیں علماء کرام اس مسئلے کے بارے میں کہ
(۱): رمضان المبارک کے روزے نہ رکھنے والے کے لیے چائے پانی وغیرہ کا انتظام کرنے سے انتظام کرنے والا گناہ گار تو نہ ہو گا ؟
(۲): روزہ شعائر اللہ میں سے ہے یا نہیں؟ اگر ہے تو دلیل کیا ہے ۔ دونوں مسئلے قرآن و حدیث کی روشنی میں وضاحت فرمائیں۔

الجوابُ حامِدا ًو مُصلیِّا ً

1، 2: رمضان کا روزہ فرض ہونے کے ساتھ ساتھ شعائر اللہ میں سے بھی ہے، اس کا بلا عذر افطار کرنا سخت گناہ ہے، ایسا شخص فاسق وفاجر کہلاتا ہے، ایسے شخص کی رمضان کے دنوں میں چائے پانی کی خدمت کرنے والا بھی گناہ گار ہوگا۔ تاہم اگر کوئی شخص رمضان کے مہینے میں بیمار ہو یا کسی شرعی عذر کی وجہ سے روزے نہ رکھ رہا ہو تو اس کی خدمت پر بہرحال باعث اجر و ثواب ہوگی ۔

مأخَذُ الفَتوی

قال الله تعالى :. تعاونوا على البر والتقوى ولا تعاونوا على الاثم والعدوان الآية (القرآن الكريم) ۔
و في البحر الرائق شرح كنز الدقائق ومنحة الخالق: وأما الفرض فحكمه اللزوم علما بالعقل وتصديقا بالقلب، وهو الإسلام وعملا بالبدن، وهو من أركان الشرائع ويكفر جاحده ويفسق تاركه بلا عذر اھ (1/ 11)۔
و في سنن الترمذي: عن أبي هريرة، عن النبي صلى الله عليه وسلم قال: «من نفس عن مسلم كربة من كرب الدنيا نفس الله عنه كربة من كرب يوم القيامة، ومن يسر على معسر في الدنيا يسر الله عليه في الدنيا والآخرة، ومن ستر على مسلم في الدنيا ستر الله عليه في الدنيا والآخرة، والله في عون العبد ما كان العبد في عون أخيه» اھ (4/ 326) واللہ اعلم بالصواب