لڑائی اور غصہ میں اللہ کے بارے میں گستاخانہ کلمات کہنا

بسا اوقات میرا اپنی بیوی سے بحث و مباحثہ ہوتا رہتا ہے، ایک مرتبہ بحث و مباحثہ کچھ زیادہ ہی ہوگیا ، اور غصہ میں میں نے کہا تم مجھ سے کیا چاہتی ہو کہ "میں تمہارے سامنے رب کی طرح مبالغہ بات بڑھا چڑھا کر پیش کروں"؟ کیا اس طرح کا کلام کرنے سے نکاح پر کوئی اثر تو نہیں پڑھتا، میرے علم کے مطابق طلاق ہی سے نکاح ٹوٹتا ہے، اب ایسی صورت حال میں میرے لئے کیا حکم ہے؟

الجوابُ حامِدا ًو مُصلیِّا ً

صورت مسئولہ میں اگر سائل یہ جانتا تھا کہ کلمہ کفر کہہ رہا ہوں تو پھر سائل دائرہ اسلام سے خارج ہوگیا ہے، اور اسکی بیوی بھی اس پر حرام ہوگئی ہے، اور اس پر تجدید ایمان و تجدید نکاح لازم ہے، لیکن اگر سائل نے خط کشیدہ الفاظ جہالت اور ناواقفیت کی بناء پر کہےہیں، تو پھر اس سے سائل کافر تو نہیں ہوا، اور نہ ہی اس پر اس کی بیوی حرام ہوئی ، البتہ اس طرح کہنے سے سائل سخت گناہ گار اور فاسق ہوا ہے، اس پر توبہ و استغفار لازم ہے، اور احتیاطاً اسے تجدید ایمان و نکاح بھی کرلینا چاہیئے۔

مأخَذُ الفَتوی

کما فی الھندیۃ: ما كان في كونه كفرا اختلاف فإن قائله يؤمر بتجديد النكاح وبالتوبة والرجوع عن ذلك بطريق الاحتياط، وما كان خطأ من الألفاظ، ولا يوجب الكفر، فقائله مؤمن على حاله، ولا يؤمر بتجديد النكاح والرجوع عن ذلك كذا في المحيط. إذا كان في المسألة وجوه توجب الكفر، ووجه واحد يمنع، فعلى المفتي أن يميل إلى ذلك الوجه كذا في الخلاصة في البزازية إلا إذا صرح بإرادة توجب الكفر، فلا ينفعه التأويل حينئذ كذا في البحر الرائق الخ (ج2 صـ283، ط: دار الفکر)۔