رسول اللہ ﷺ کے بارے میں غلط خیالات آنے سے ایمان کا حکم

میرے سوال کا جواب ضرور دینا، بہت پریشان ہوں، جب بھی پیارے نبی ﷺ کا نام لیتی ہوں، مجھے بہت برا خیال آتا ہے، اتنا کہ اللہ نہ کرے اگر میں بتاؤ ں تو قتل کردی جاؤں، میں بہت پریشان ہوں، کیا میں کافر ہوگئی ہوں، کیا اللہ اور اس کے پیارے نبی ﷺ مجھ سے ناراض ہوگئے ہیں، میں بہت کوشش کرتی ہوں کہ خیال نہ آئے لیکن یہ خیال مجھے بہت شدت سے تنگ کرتا ہے، جب مجھے خیال آتا ہے، میں شیطان پر لعنت کرتی ہوں، مجھے بتائیں مجھے لگتا ہے میں بدبخت ہوں، میں ایسا کچھ بھی نہیں کروں گی ان شاء اللہ، مجھے آقا کی محبت چاہیئے، میں ایسا نہیں کرنا چاہتی، بس خیال بہت تنگ کرتا ہے، میں روتی ہوں، مجھے اس سے نجات کیسے ملے گی، اور کیا میں مسلمان ہوں، کیا میری ساری زندگی کے اعمال ضائع ہوگئے؟ میرے لئے دعا کریں۔

الجوابُ حامِدا ًو مُصلیِّا ً

واضح ہوکہ برے خیالات اور وساوس کا آنا چونکہ غیر اختیاری عمل ہے، اس طرح کے خیالات شیطان کی طرف سے ہوتے ہیں، لہذا سائلہ کا ان خیالات کی وجہ سے اپنے ایمان اور اعمال سے متعلق شکوک و شبہات میں پڑ کر پریشان نہیں ہونا چاہیئے، بلکہ جب اس طرح کے خیالات آئیں تو سائلہ کو چاہیئے کہ ان کی طرف توجہ نہ دے، بلکہ اللہ تعالٰی سے پناہ مانگے، اور اللہ کے ذکر و اذکار میں مشغول ہوجائے، اور اس کے ساتھ ساتھ اس آیت مبارکہ کا کثرت سے ورد کرتی رہا کرے، " وقل رب اعوذبک من ھمزٰت الشیٰطین" ۔(سورۃ مؤمنون: آیت 96 )امید ہے ان شاء اللہ ، اللہ تعالٰی وساوس کی بیماری سے حفاظت فرمائیں گے۔

مأخَذُ الفَتوی

کما فی مرقاۃ المفاتیح شرح مشکوۃ المصابیح: (وعن ابن عباس - رضي الله عنهما - قال: قال رسول الله - صلى الله عليه وسلم -: " الشيطان جاثم) : أي: لازم الجلوس ودائم اللصوق (على قلب ابن آدم، فإذا ذكر الله) : أي: ابن آدم بقلبه، أو ذكر قلبه الله (خنس) : أي: انقبض الشيطان وتأخر عنه واختفى، فتضعف وسوسته وتقل مضرته، (وإذا غفل) : أي: هو، أو قلبه عن ذكر الله (وسوس) : أي: إليه الشيطان وتمكن تمكنا تاما منه، وفيه إيماء إلى أن الغفلة سبب الوسوسة لا العكس على ما هو المشهور عند العامة. (رواه البخاري تعليقا) : أي: بلا ذكر سند الخ (ج4 صـ1559 ط: دار الفکر)۔