صرف قرآن کافی ہے اور احادیث جھوٹی ہیں کہنے والے کا ایمان

میرے شوہرنے مجھے حالت حمل میں چھوڑدیا تاکہ وہ ایک غیر مسلم عورت سے شادی کرے، اور میری اور میرے بچوں سے اسکی جان چھوٹ جائے، وہ ایک ہزار میل دور اپنی والدہ کے گھر منتقل ہوچکا ہے، اس نے اب تک نہ تو کھانے کا خرچہ بھیجا ہے اور نہ ہی یہ فیصلہ کیا ہے کہ وہ مجھے طلاق دیگا یا نہیں، وہ اسلامی تعلیمات کے خلاف بات کرتا رہتا ہے، اور سنت پر بھی یقین نہیں رکھتا، اس کا کہنا ہے کہ صرف قرآن حجت ہے، اسلئے کہ اس کی رائے میں تمام احادیث جھوٹی ہیں، براہ مہربانی مجھے میرے حقوق کے بارے میں رائے دیں، اور بتائیں کہ کیا میرا شوہر اب بھی مسلمان ہے؟ اور اگر وہ مسلمان نہیں تو پھر میرے لئے کیا حکم ہے؟

الجوابُ حامِدا ًو مُصلیِّا ً

بالفرض سائلہ کا شوہر کسی کلمہ کفر کے ارتکاب کی بناء پر دائرہ اسلا سے خارج ہوکر مرتد بھی بن گیا ہو تو اس صورت میں اسے دوبارہ اسلام کی دعوت دینا لازم ہے، پھر بھی اگر وہ تسلیم نہ کرے، بلکہ کفر و ارتداد والی زندگی کو ہی ترجیح دے، اور وہ ہوبھی دار الحرب میں تو اسے قتل نہیں کیا جائے گا، مگر سائلہ کا اسکے ساتھ عقد نکاح ختم ہوچکا ہے، اب اسکا ازدواجی حیثیت سے رہنا جائز نہیں، اس سے احتراز لازم ہے، جبکہ ایام عدت گزار کر وہ کسی دوسرے مسلمان مرد سے نکاح کرسکتی ہے، اسے تفریق قاضی یا متارکہ وغیرہ کی ضرورت نہیں۔

مأخَذُ الفَتوی

کما قال اللہ تعالٰی: وَلَئِنْ سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنْتُمْ تَسْتَهْزِئُونَ (65) لَا تَعْتَذِرُوا قَدْ كَفَرْتُمْ بَعْدَ إِيمَانِكُمْ إِنْ نَعْفُ عَنْ طَائِفَةٍ مِنْكُمْ نُعَذِّبْ طَائِفَةً بِأَنَّهُمْ كَانُوا مُجْرِمِينَ (66)سورۃ التوبۃ)۔
وفی الدر المختار: من هزل بلفظ كفر ارتد وإن لم يعتقده للاستخفاف فهو ككفر العناد الخ (ج4 صـ232، ط: دار الفکر)۔
وفی الھندیۃ: ومنها ما يتعلق بالأنبياء - عليهم الصلاة والسلام - من لم يقر ببعض الأنبياء - عليهم الصلاة والسلام -، أو لم يرض بسنة من سنن المرسلين فقد كفر، وسئل ابن مقاتل عمن أنكر نبوة الخضر وذي الكفل فقال: كل من لم تجتمع الأمة على نبوته لا يضره إن جحد نبوته ولو قال: لو كان فلان نبيا لم أؤمن به فقد كفر كذا في المحيط الخ (ج2 صـ263، ط: دار الفکر)۔
واللہ اعلم بالصواب