دورانِ نماز باجماعت وضوء ٹوٹ جاۓ ۔۔۔۔۔

کیا فرماتے ہیں علماءِ کرام اس مسئلہ کے بارے میں کہ میرا پیٹ خراب رہتا ہے اور صرف دین کے کام یا نماز پڑھتے وقت خاص طور ہوا کا اخراج ہوتا ہے، اب مسئلہ یہ ہے کہ میں سنت یا نفل نماز پڑھتا ہوں تو وضو ٹوٹ جانے پر میں نماز کو چھوڑ کر دوبارہ وضو کرتا ہوں اور اس نماز کو دوبارہ پڑھتا ہوں مگر جب جماعت کے ساتھ نماز پڑھتا ہوں تو وضو ٹوٹ جانے پر میں کیا کروں؟ اور اگر میرا وضو ٹوٹ گیا اور میں امام کے پیچھے نماز پڑھتا رہا تو میری نماز ہوگی یا نہیں؟ دوسرا مسئلہ یہ ہے کہ میں نے بہشتی زیور میں پڑھا تھا کہ بیت الخلاء میں کسی بھی اللہ کے ولی یا کوئی بھی ایسا پاک نام یا کوئی بھی قرآن کا لفظ نہیں لینا چاہئے مگر میں نام لیتا تو نہیں ہوں لیکن دل میرا بولتا رہتا ہے کبھی کچھ تو کبھی کچھ، مگر بولتا صرف پاک نام یا کوئی بھی یاد کی ہوئی دعائیں اور یہ مسئلہ بہشتی زیور پڑھنے کے بعد ہی سے شروع ہوا ہے اس سے پہلے نہیں تھا اب سمجھ میں نہیں آتا کہ میں کیا کروں، آپ میری اصلاح فرمائیں تاکہ میں صحیح نماز ا ادا کرسکوں۔ شکریہ

الجوابُ حامِدا ًو مُصلیِّا ً

خروجِ ریح چاہے فرض میں ہو یا نفل میں مفسدِ صلوٰۃ ہے، اس لئے دورانِ نمازِ فرض بھی جب یہ عارضہ لاحق ہو تو وضو کے بعد جماعت میں شریک ہوکر بصورتِ لاحق نمازپوری کرلے، جبکہ بیت الخلاء میں دل کے اندر آیات اور اسماءِ الٰہیہ کا آنا باعثِ گناہ نہیں۔

مأخَذُ الفَتوی

فی الشامیۃ: (قولہ لأنہ اختلاج) ای لیس بریح حقیقۃ، ولو کان ریحا فلیست بمنبعثۃ عن محل النجاسۃ فلا تنقض کما قد مناہ (الٰی قولہ) وفی المنح عن الخلاصۃ: مناط النقض العلم بکونہ من الأعلٰی فلا نقض مع الاشتباہ، وہو موافق للفقہ، والحدیث الصحیح حتی یسمع صوتا او یشم ریحًا وبہ یعلم أنہ من الأعلی۔ (ج۱، ص۱۳۶)-
وفیہ: إذا أراد أن یدخل الخلاء ینبغی أن یقوم قبل ان یغلبہ الخارج (الٰی قولہ) ولا یفکر فی أمر الآخرۃ کالفقہ والعلم، فقد قیل بمنع منہ شیء أعظم منہ ولا یرد سلاما ولا یجیب مؤذنا، فان عطس حمد اﷲ تعالٰی بقلبہ۔ (ج۱، ص۳۴۵)-
وفی الدر: وفیہا یکرہ الکلام فی المسجد وخلف الجنازۃ وفی الخلاء وفی الشامیۃ: (قولہ وفی الخلاء) لأنہ یورث المقت من اﷲ تعالٰی۔(ج۶، ص۴۱۸) واﷲ اعلم