مسجد کمیٹی کے صدر کا علماء و طلباءسے متعلق بدگوئی کرنا

کیا فرماتے ہیں علماءِ کرام و مفتیانِ عظام اس مسئلہ کے بارے میں کہ ہماری مسجد کی کمیٹی کے صدر صاحب نے بعض علماءِ کرام کے لیے نازیبا الفاظ استعمال کیے اور ان پر بدکاری کا الزام بھی لگایا ہے اور مدرسہ کے مہتمم حضرات کو عیاش کہا اور مدرسہ کے طلباءِ کرام پر بھی تنقید و الزام تراشی کرتے رہتے ہیں ، تو ان کا یہ عمل شرعاً کیساہے؟
نیز فضائلِ اعمال جس کی تعلیم مساجد میں ہوتی ہے، اس کے بارے میں کہا کہ اس میں شرکیہ اور من گھڑت قصے ہیں تو ایسے شخص کا مسجد کمیٹی کا صدر ہونا درست ہے یا نہیں؟ جبکہ اس سے زیادہ متقی لوگ موجود ہیں، تفصیلی جواب عنایت فرما کر ممنون فرمائیں۔

الجوابُ حامِدا ًو مُصلیِّا ً

مذکور کمیٹی صدر سے متعلق جو اُمور ذکر کیے گئے ہیں اگر واقعۃً اُن میں پائے جاتے ہیں تو اس کا اہلِ علم کے بارے میں مذکور رویّہ اختیار کرنا انتہائی ناپسندیدہ او رقبیح ہے اور اس کی وجہ سے وہ بہت سخت گناہ گار ہو رہا ہے اور اگر اس کا یہ طرزِ عمل ذاتی رنجش کے بجائے محض علم دشمنی کی بناء پر ہو تو یہ موجبِ کفر ہے اسی طرح فضائلِ اعمال کے بارے میں اس کا مذکور جملہ کہنا بھی جہالت پر مبنی ہے، ایسا شخص مسجد اور مدرسہ کمیٹی کی صدارت تو کجا ،رکنیت کا بھی اہل نہیں، اہل محلہ کو چاہیے کہ اس کی جگہ کسی ایسے شخص کا انتخاب کریں جو متقی پرہیزگار ہونے کے ساتھ علم اور اہلِ علم سے بھی محبت رکھتا ہو ، اور دین کا خیر خواہ اور اس کی اشاعت کا سچا جذبہ رکھنے والا ہو۔

مأخَذُ الفَتوی

ففی مشكاة المصابيح: و عن عبد الله بن مسعود قال: قال رسول الله -صلى الله عليه وسلم-: ’’سباب المسلم فسوق و قتاله كفر‘‘ . متفق عليه(3/ 1356)۔
و فی الترغيب و الترهيب: وَ عَن أبي أُمَامَة عَن رَسُول الله - صلى الله عَلَيْهِ وَسلم - قَالَ ثَلَاث لَا يستخف بهم إِلَّا مُنَافِق ذُو الشيبة فِي الْإِسْلَام وَ ذُو الْعلم وَ إِمَام مقسط اھ (1/ 65)۔
و فی البحر الرائق: و یخاف علیه الکفر إذا شتم عالماً أو فقیھا من غیر سبب ظاہرٍ اھ(۵/۱۲۳)۔
و فیه أیضا: و من أبغض العلماء من غیرسبب ظاہر خیف علیه الکفر اھ(۵/۱۲۳)۔
و فیه أیضا: و لو صغر الفقیه أو العلوی قاصدا الأستخفاف بالدین کفر لا إن لم یقصدہ اھ (۵/۱۲۴)۔