ترکہ کی تقسیم اور بیٹوں کی ترکہ کے مکان پر خرچ کی ہوئی رقم کا حکم

ایک آدمی نے ایک گھر اپنی وراثت میں چھوڑا، جس کے وارثین میں ایک بیوہ، دو بیٹے اور تین بیٹیاں ہیں، باپ کی وفات کے بعد ایک بیٹے نے اسی مکان پر دوسری منزل اپنے پیسوں سے تعمیر کی اور بعد میں چھوٹے بیٹے نے اپنے پیسوں سے تیسری منزل تعمیر کردی، اب اس مکان کی تقسیمِ وراثت کیسے ہوگی؟ کیا بیٹوں کے پیسوں سے کی گئی تعمیر بھی مکان کی قیمت میں شامل ہوکر سب بہنوں اور ماں کو ملے گی یا پھر مکان کی جو پہلی منزل ہے، اس پر ملے گی؟ اس بارے میں اسلامی، قانونی اور اخلاقی حق واضح کردیں، جو باپ نے اپنی وراثت میں چھوڑا ہے۔

الجوابُ حامِدا ًو مُصلیِّا ً

صورتِ مسئولہ میں اگر مرحوم کے دونوں بیٹوں نے ورثاء کی اجازت و رضامندی سے اپنے لئے مذکور تعمیر کی ہو تو مذکور تعمیر ان دونوں بیٹوں کی ملکیت ہے، چنانچہ تقسیمِ ترکہ کے وقت گھر اور اس کی تعمیر کی الگ الگ قیمت معلوم کر کے مذکور تعمیر کے مقابلہ میں جتنی رقم آئے، اتنی رقم ان بیٹوں کو دینا لازم ہوگا، جبکہ باقی ماندہ رقم مرحوم کا ترکہ شمار ہو کر تمام ورثاءمیں حسبِ حصصِ شرعیہ تقسیم ہوگی ۔
اس کے بعد واضح ہو کہ صورتِ مسئولہ میں مرحوم والد کا ترکہ اصولِ میراث کے مطابق اس کے مذکور ورثاء میں اس طرح تقسیم ہوگا کہ مرحوم نے بوقتِ انتقال جو کچھ منقولہ و غیر منقولہ مال و جائیداد، سونا ، چاندی ، زیورات ، نقد رقم اور ہر قسم کا چھوٹا بڑا گھریلو ساز و سامان اپنی ملکیت میں چھوڑا ہے ، اس میں سے سب سے پہلے مرحوم کے کفن دفن کے متوسط مصارف ادا کریں ، اس کے بعد دیکھیں کہ اگر مرحوم کے ذمہ کچھ قرض یا بیوہ کا حق مہر واجب الادا ہو ، تو وہ ادا کریں ، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی (1/3 ) کی حد تک اس پر عمل کر کے اس کے بعد جو کچھ بچ جائے اس کے کل آٹھ (8) حصے بنائے جائیں ، جن میں سے مرحوم کی بیوہ کو ایک ( 1 ) حصہ ، جبکہ دو بیٹوں میں سے ہر ایک کو دو ( 2) حصے ، اور ہر بیٹی کو ایک ( 1 ) حصہ دیا جائے -

مأخَذُ الفَتوی

کما فی درر الاحکام: الاحتمال الثالث - إذا عمر أحد الشريكين المال المشترك بإذن الشريك الآخر أي أن تكون التعميرات الواقعة للمعمر وملكا له فتكون التعميرات المذكورة ملكا للمعمر ويكون الشريك الآخر قد أعار حصته لشريكه.الخ ( ج 3 ص 313)۔