"سنت کی ماں کی آنکھ" کہنے کا حکم

کیا فرماتے ہیں علماءِ کرام اس مسئلہ کے بارے میں کہ میرا ایک بندہ کے ساتھ جھگڑا ہوا، جس میں اس نے مجھ سے جھگڑے کے دوران کہا کہ تم نے سنتِ رسول چہرے پر رکھی ہے، میں نے غصہ میں اس کو کہا کہ سنت کی ماں کی آنکھ، لہٰذا اس بارے میں مجھے علماء سے رہنمائی کی درخواست ہے ، میں نے توبہ و استغفار بھی کیا اور اللہ تعالیٰ سے معافی بھی مانگی ہے۔
نوٹ! سائل سے مزید وضاحت کرنے پر معلوم ہوا کہ یہ جملہ عام طور پر ایسے مواقع میں استعمال کیا جاتا ہے، جہاں کسی چیز کو ویلیو اور اہمیت نہ دینا مقصود ہو اور سوال میں بھی جب مذکور شخص نے سائل کو سنت داڑھی رکھنے کا طعنہ دیا تو اس پر سائل نے یہ جملہ کہا۔

الجوابُ حامِدا ًو مُصلیِّا ً

سوال میں مذکور الفاظ " ماں کی آنکھ الخ " اگر عام طور پر براہِ راست کسی چیز کی توہین اور تحقیر کے لئے استعمال نہ ہوتے ہوں، بلکہ قول و فعل کو اہمیت نہ دینے کے لئے بولے جاتے ہوں، جیسا کہ سوال کے ساتھ درج نوٹ میں اس کی وضاحت موجود ہے، اور جھگڑے کے دوران مذکور الفاظ کے استعمال سے سائل کی مراد بھی داڑھی اور سنتِ رسول کی توہین نہ ہو، بلکہ سامنے والے کو خاموش کرانا مقصود ہو ،تو اگرچہ یہ الفاظ کفریہ شمار نہیں ہوں گے، لیکن سنت سے متعلق اس طرح کے الفاظ کا استعمال کرنا بے ادبی ضرور ہے، اس لئے سائل کو اپنے اس عمل پر توبہ و استغفار اور آئندہ اس طرزِ عمل سے مکمل اجتناب لازم ہے۔

مأخَذُ الفَتوی

ففی الفتاوى الهندية: وبعض المتأخرين قالوا: إذا قال ذلك على وجه الإهانة كان كفرا، وبدونه لا يكون كفرا. (إلی قوله) ولو قال: أين جه رسم است سبلت بست كردن ودستار بزير كلو آوردن فإن قال ذلك على سبيل الطعن في سنة رسول الله - صلى الله عليه وسلم - فقد كفر كذا في المحيط الخ ( ج 2 ص 265 ط: ماجدیہ)
و فی رد المحتار تحت ( قولہ والتوبۃ) : وما كان خطأ من الألفاظ ولا يوجب الكفر فقائله يقر على حاله، ولا يؤمر بتجديد النكاح ولكن يؤمر بالاستغفار والرجوع عن ذلك الخ (ج 4 ص 247 ط: سعید) ۔