ترکہ کی تقسیم

السلام علیکم ورحمۃ اللہ وبرکاتہ! امید ہے اللہ سبحانہ وتعالیٰ کی ذات سے کہ سب بخیر وخوبی زندگی کے معاملات گزار رہے ہونگےانشاء اللہ -
محترم آپ سے گزارش ہے کہ مجھے معلوم کرنا تھا شرعی حساب سے ہمیں ، میں خود , میری دو بہنوں کو والد کی طرف سے جو حصہ ملا اس کو کس حساب سے آپس میں تقسیم کیا جائے، میری والدہ محترمہ بھی اس دنیا میں نہیں ہے، حصہ ہم تین بہن بھائی میں تقسیم ہوگا، ہمیں والد کی طرف سے ایک گھر ملا ہے، جس کی کل قیمت 90 سے 100 لاکھ ہیں، مہربانی فرماکر مجھے بتائیں کہ ہم کیسے تقسیم کریں آپس میں، بہت شکریہ۔

الجوابُ حامِدا ًو مُصلیِّا ً

سائل کے والد مرحوم کا ترکہ ان کے مذکور ورثاء کے درمیان اصولِ میراث کے مطابق اس طرح تقسیم ہوگا کہ مرحوم نے بوقتِ انتقال جو کچھ منقولہ وغیر منقولہ مال وجائیداد، سونا چاندی، زیورات، نقدی اور ہر قسم کا چھوٹا بڑا گھریلو ساز وسامان اپنی ملکیت چھوڑا ہے، وہ سب مرحوم کا ترکہ ہے، جس میں سب سے پہلے مرحوم کے کفن دفن کے متوسط مصارف ادا کریں، اس کے بعد دیکھیں کہ اگر مرحوم والد کے ذمہ کچھ قرض واجب الادا ہو تو وہ ادا کریں، اس کے بعد دیکھیں کہ اگر مرحوم نے کوئی جائز وصیت کی ہو، تو بقیہ مال کے ایک تہائی (1/3) کی حد تک اس پر عمل کریں، اس کے بعد جو کچھ بچ جائے اس کے کل چار (4) حصے بنائے جائیں، جن میں سے بیٹے کو دو(2) حصے، اور ہر بیٹی کو ایک (1) حصہ دیا جائے، جیسا کہ ذیل کے نقشے سے بھی واضح ہورہا ہے، مزید سہولت کے لئے فیصدی حصہ بھی لکھ دیے گئے ہیں،ملاحظہ ہو۔
مسئلہ4 والد مرحوم
میتــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بیٹا بیٹی بیٹی
2 1 1
50% 25% 25%