بیوی کا شوہر کی زندگی میں اس کے جائیداد میں حصہ داری کا دعویٰ کرنا

کیا فرماتے ہیں مفتیانِ کرام اس مسئلے کے بارے کہ میں نے اپنی محنت و مزدوری سے کچھ مال و جائیداد کمایا ہے،اس کے متعلق آپ حضرات سے یہ معلوم کرنا ہے کہ کیا میری زندگی میں اس مال و جائیداد میں میری بیوی کا کوئی حصہ ہے یا نہیں؟

الجوابُ حامِدا ًو مُصلیِّا ً

واضح ہو کہ ہر شخص اپنی صحت والی زندگی میں مرض الوفات میں مبتلا ہونے سے قبل اپنے مال و جائیداد کا تنہا مالک ہوتا ہے، وہ اس میں جس طرح چاہے جائز تصرف کر سکتا ہے، اس کی زندگی میں اس کے مال و جائیداد میں کسی کا کوئی حق نہیں ہوتا اور نہ ہی اس کے ذمہ اپنا مال و جائیداد تقسیم کرنا لازم اور ضروری ہوتا ہے،لہذا سائل کے مال و جائیداد میں اگر اس کی بیوی نے اپنا ذاتی مال شامل نہ کیا ہو، بلکہ خالص اس کی محنت مزدوری ہو تو اس کی زندگی میں نان و نفقہ کے علاوہ اس مال میں بیوی کا کوئی حصہ نہیں اور نہ ہی وہ اس کا مطالبہ کر سکتی ہے،البتہ اگر سائل اپنی مرضی اور خوشی سے اپنے مال و جائیداد میں سے اپنی بیوی کو کچھ دینا چاہے تو شرعاً ایسا کرنا جائز ہے، اور یہ اس کی طرف سے بیوی کے لئے ہبہ اور گفٹ کہلائے گا ۔

مأخَذُ الفَتوی

کما فی الشامیۃ: (و تتم) الهبة (بالقبض) الكامل (و لو الموهوب شاغلاً لملك الواهب لا مشغولاً به) و الأصل أن الموهوب إن مشغولاً بملك الواهب منع تمامها، و إن شاغلاً لا، فلو وهب جرابًا فيه طعام الواهب أو دارًا فيها متاعه، أو دابةً عليها سرجه و سلمها كذلك لاتصح، و بعكسه تصح في الطعام و المتاع و السرج فقط؛ لأنّ كلاًّ منها شاغل الملك لواهب لا مشغول به؛ لأن شغله بغير ملك واهبه لايمنع تمامها كرهن و صدقة؛ لأن القبض شرط تمامها و تمامه فى العمادية إلخ۔ (ج: 5، ص: 690،ط: سعيد)-
و فیها ایضاً: و شروطہ ثلاثة :موت مورث حقیقۃً او حکماً کمفقود او تقدیراً کجنین فیہ غرۃ، و وجود وارثہ عند موتہ حیاً حقیقۃً او تقدیراً إلخ۔ (ج: 6، ص: 756،ط: سعيد)-