جن بیٹیوں کا والد سے پہلے انتقال ہوجائے ان کی اولاد کا نانا کے ترکہ میں حصہ ہوگا؟

کیا فرماتے ہیں مفتیان کرام اس مسئلہ کے بارے میں کہ :
مسمی زید کا انتقال ہوچکا ہے، بوقت انتقال ان کے ورثاء میں بیوہ، تین بیٹے اور چار بیٹیاں موجود تھیں، مسمی زید کے انتقال کے دو سال بعد ان کی بیوی کا بھی انتقال ہوگیا تھا، جبکہ دو بیٹیاں والد کے انتقال سے پہلے انتقال کرگئی تھی، اب ان کے اولاد کا مسمی زید کے ترکہ میں حصہ ہوگا کہ نہیں؟ اور دیگر ورثاء کا کتنا حصہ ہوگا؟ براہ کرم شریعت کی روشنی میں جواب عنایت فرمائیں۔

الجوابُ حامِدا ًو مُصلیِّا ً

واضح ہو کہ جن اولاد کا انتقال والد کی زندگی میں ہوجائے ، ان کا یا ان کی اولاد کا میت کے ترکے میں شرعاً کوئی حصہ نہیں ہوتا ، لہٰذا صورتِ مسئولہ میں مرحوم والد کی جس بیٹیوں کا انتقال مرحوم کی زندگی میں ہوا تھا ،ان کی اولاد کا مر حوم نانا کے ترکہ میں شرعاً کوئی حصہ نہیں ، البتہ اگر مرحوم کےدیگر ورثا ء عاقل و بالغ ہوں اور اپنی مرضی سے انہیں بھی کچھ دینا چاہیں ، تو اس کا انہیں اختیار ہے ۔
اس کے بعد واضح ہو کہ مسمی زید مرحوم کا ترکہ اس کے موجود ورثاء میں اصول میراث کے مطابق اس طرح تقسیم ہوگا کہ مرحوم نے بوقت انتقال اپنی ملکیت میں جو کچھ منقولہ و غیر منقولہ مال و جائیداد ، سونا ، چاندی ، زیورات ، نقد رقم اور ہر قسم کا چھوٹا بڑا گھریلو سازو سامان چھوڑا ہے وہ سب مرحوم کا ترکہ ہے، اس میں سب سے پہلے مرحوم کے کفن دفن کے متوسط مصارف ادا کریں ، اس کے بعد دیکھیں کہ اگر مرحوم کے ذمہ کچھ قرض واجب الاداء تو وہ ادا کریں،اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی (3/1) کی حد تک اس پر عمل کریں،اس کے بعد جو کچھ بچ جائے اس کے کل دس (10) حصّے بنائے جائیں، جن میں سے مرحوم کے ہر بیٹے کو دو (2) حصّے ، جبکہ ہر بیٹی کو ایک (1) حصہ دیا جائے، جیسا کہ ذیل کے نقشہ سے بھی واضح ہورہا ہے مزید سہولت کے لئے فیصدی حصّے بھی لکھ دیے گئے ہیں ،ملاحظہ ہو!

مسئلہ10 (والدین) المضروب10
میـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بیٹا بیٹا بیٹا بیٹی بیٹی بیٹی بیٹی
2 2 2 1 1 1 1
20% 20% 20% 10% 10% 10% 10%