اولاد میں سے کسی کا باپ سے کچھ مال لے کر لے کر اپنے حصۂ میراث سے دستبردار ہونے کا حکم

جناب مفتی صاحب السلام علیکم !
قرآن و حدیث کی روشنی میں ر ہنمائی فرمائیے۔
زید کے دو بیٹے اور دو بیٹیاں (ایک شادہ شده اور دوسری غیر شادی شدہ) بیوی، ماں باپ ہیں، بڑی بیٹی کو مکان کی ضرورت ہوئی تو زید نے اپنی کل وراثت کا حساب لگایا وراثت کے فارمولے کے مطابق زید نے بڑی بیٹی کے حصے کے برابر رقم سے مکان خرید کر اُس کے حوالے کر دیا، جبکہ دوسرے ورثاء کا حصہ تقسیم نہیں کیا ،اور بڑی بیٹی سے تحریر بھی حاصل کر لی ،جس کی کاپی منسلک ہے۔
۱:زید کے پاس جو مال باقی ورثاء کا بچ رہےگا، کیا اس میں مستقبل میں ہونے والے اضافہ میں بڑی بیٹی کا کوئی حصہ ہوگا؟
۲:زید کے انتقال کے بعد کیا وراثت میں بڑی بیٹی کا کوئی حصہ ہوگا؟
منسلکہ تحریر:
میں (موجودہ رہائشی پتہ کراچی) بلا کسی جبر و اکراه بہ ہوش و حواس اپنی رضامندی اور خوشی سے اس بات کا اقرار کرتی ہوں کہ میرے والدین نے مجھے اپنی جائیداد و وراثت میں سے جو میرا حصہ مجھے دیا ہے جو کہ ایک مکان کی صورت میں ہے۔ جس کی مالیت میں نے وصول کر لی ہے۔
لہٰذا اب میں اپنی والدہ اور والد کی بالواسطہ یا بلا واسطہ جائیداد ، نقد، سونا، زیور وغیرہ یا ان کی زندگی میں ہونے والی ان کی مزید آمدنی اور اس سے بننے والی مزید کسی بھی جائیداد ، نقد ، سونا، زیور، جائیداد وغیرہ سے دست بردار ہوتی ہوں اور ان کی وفات کے بعد ان کے ترکہ سے کسی بھی قسم کا کوئی حصہ نہ لینے کی پابند ہونگی اور ان کو ورثاء سے کسی کسی بھی قسم کا مطالبہ کرونگی۔

الجوابُ حامِدا ًو مُصلیِّا ً

صورتِ مسئولہ میں مذکور شخص مسمی زید نے اپنی حیات میں جو مکان دیا ہے، وہ اس کی طرف سے ہبہ (گفٹ) کہلاتا ہے ،وہ میراث کا بدل نہیں، اس لئے مسمی زید کی وفات کے بعد وہ بدستور اس کے ترکے میں حقدار ہوگی، الا یہ کہ موصوف اپنی حیات میں دیگر ورثاء میں اپنا کل ترکہ تقسیم کر دے ،اور ہر ایک کو اس کے حصے کا مالک بنا دے، اور مذکور بیٹی کو مزید کچھ بھی نہ دے تو اس کا اسے اختیار ہے، اور ایسا کرنے کی صورت میں وہ شرعا گناہ گار نہ ہوگا۔

مأخَذُ الفَتوی

ففي شرح لمجلة : يملك الموهوب له الموهوب بالقبض وھو شرط لثبوت الملک اھ (۱/ ۴۷۳)۔
و في تكملة حاشية رد المحتار: الارث جبري لا يسقط بالاسقاط. (2/ 116)۔