ترکہ کی تقسیم بصورتِ مناسخہ

السلام علیکم ورحمت الله وبرکاتہ محترم مفتی صاحب! عرض یہ ہے کہ ہمارے ہاں ایک میراث کا مسئلہ پیش آیا ہے، براہ کرم قرآن و سنت کی روشنی میں اس کی شرعی تقسیم تحریر فرما د یں۔ تفصیل درج ذیل ہے: واقعہ کی ترتیب 1. مرحوم اشرف علی (اصل میت) کا انتقال ہوا۔ اس وقت ورثاء درج ذیل تھے: دو بیٹے: (1) جاوید، (2) خالد چھ بیٹیاں:1. نعیم النساء۔2. زیب النساء۔3. مہرانساء۔4. جنت5. خالدہ۔6. ارم ، سن 2015 میں بیٹا خالد فوت ہوگیا، اس کی کوئی اولاد نہ تھی، بیوہ نے بعد میں دوسری جگہ نکاح کرلیا،پھر دوسرا بیٹا جاوید مارچ 2025 میں فوت ہوا،اس کے ورثاء یہ ہیں: بیوی ، چار بچے:1. محمد شاہ زین۔2. محمد شاہ ویز۔3. انابیہ۔4. عنایہ (جو والد کی وفات کے بعد پیدا ہوئی ہے) 4. مرحوم اشرف علی کی میراث ابھی تک تقسیم نہیں ہوئی۔ محترم مفتی صاحب! براہ کرم یہ بتائیں کہ: 1. مرحوم اشرف علی کی میراث شرعی اصولوں کے مطابق کس طرح تقسیم ہوگی؟ 2. ہر وارث کا حصہ فیصد یا رقم کی صورت میں کتنا ہوگا؟ جبکہ میراث میں ایک گھر ہے جس کی قیمت 80لاکھ روپے ہیں ۔ 3. جاوید کی بیوی اور بچوں کا ملا کر مکمل کتنا حصہ بنتا ہے؟بینوا توجروا جزاکم اللہ خیراً۔

الجوابُ حامِدا ًو مُصلیِّا ً

واضح ہو کہ مرحوم اشرف علی کا ترکہ اس کے موجودہ ورثاء میں اصولِ میراث کے مطابق اس طرح تقسیم ہوگا کہ مرحوم نے بوقتِ انتقال اپنی ملکیت میں جو کچھ منقولہ و غیر منقولہ مال و جائیداد سونا ،چاندی ، زیوارات، نقد رقم اور ہر قسم کا سامان چھوڑا ہے، وہ سب مرحوم کا ترکہ ہے۔ اس میں سے سب سے پہلے مرحوم کے کفن دفن کے متوسط مصارف ادا کریں ، اس کے بعد دیکھیں کہ اگر مرحوم کے ذمہ کچھ قرض واجب الادا ہو تو وہ ادا کریں، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی ( 1/3) کی حد تک اس پر عمل کریں ، اس کے بعد جو کچھ بچ جائے ، اس کے کل تین ہزار اٹھ سو چالیس (3840) حصے بنائیں جائیں،جن میں ہر بیٹی کو چار سو چھپن(456) ،بہو( خالد مرحوم کی بیوی ) کو ایک سو بانوے (192)،بہو (جاوید مرحوم کی بیوی) کو ایک سو چودہ (114 )،پوتے ( جاوید مرحوم کے ہر بیٹے ) کو دو سو چھیا سٹھ ( 266)،اور ہر پوتی ( جاوید مرحوم کی ہر بیٹی ) کو ایک سو تینتیس ( 133) حصے دیے جائیں ۔