کلالہ کی میراث کا حکم

السلام علیکم، مفتی صاحب ! آپ سے شریعت کے مطابق کلالہ کا مسئلہ دریافت کرنا ہے، ہمارے چچا نثار احمد خان کا انتقال 2022 میں 86 سال کی عمر میں ہوا، ان کی کوئی اولاد نہیں تھی ،ہمارے چچا کے تین بھائی تھے تینوں بھائی کا انتقال چچا کی زندگی ہی میں ہو گیا تھا ،اب کیا جائیداد کی تقسیم میں حصہ دار صرف بھتیجے ہی ہوں گے یا بھتیجیا ں بھی حصہ دار ہوں گی؟ اور کس تنا سب سے ہوں گے؟ شریعت کے مطابق جواب عنایت فرمائیں ، عین نوازش ہوگی۔ بھتیجے 8، بھتیجیاں 8،

الجوابُ حامِدا ًو مُصلیِّا ً

واضح ہوکہ بھتیجے اپنے مرحوم چچا کے ترکہ میں ان کی اولادنہ ہونےکی صورت میں عصبہ بنفسہ کی حیثیت سے میراث کے حقدار ہوتے ہیں، جبکہ بھتیجیاں شرعاً ذوی الارحام میں شامل ہیں اور عصبہ کی موجودگی میں ذوی الارحام محروم ہوتے ہیں، لہذا صورتِ مسئولہ میں بھتیجیاں اپنے مرحوم چچاکےترکہ میں حصہ دار نہیں۔
اس کے بعد واضح ہوکہ سائل کے مرحوم چچا کے انتقال کےبعدانکا ترکہ ان کےموجود ورثاء میں اصولِ میراث کے مطابق اس طرح تقسیم ہوگا کہ مرحوم نے بوقتِ انتقال جو کچھ منقولہ اور غیرمنقولہ مال و جائیداد، سونا، چاندی ، زیورات ، نقدی رقم اور ہر قسم کا چھوٹا بڑا گھریلو ساز و سامان اپنی ملکیت میں چھوڑا ہے، وہ سب مرحوم کا ترکہ ہے، اس میں سے سب سے پہلے مرحوم کے کفن دفن کے متوسط مصارف ادا کر نے کے بعد دیکھیں کہ اگر مرحوم کے ذمہ کچھ قرض یابیوہ کا حقِ مہرواجب الأدا ہو تو وہ ادا کریں، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی (3 /1) کی حد تک اس پر عمل کریں، اس کے بعد جو کچھ بچ جائے اس کے کل آٹھ (8) حصے بنائے جائیں، اور ہرایک بھتیجے کو ایک ایک (1)حصہ دیدیا جائے، مزید سہولت کیلئے فیصدی حصے بھی لکھ دئیےگئے ہیں، ملاحظہ ہو !
مسئلہ8 مرحوم چچا نثار احمد
میتـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بھتیجا بھتیجا بھتیجا بھتیجا بھتیجا بھتیجا بھتیجا بھتیجا
1 1 1 1 1 1 1 1
12.5% 12.5% 12.5% 12.5% 12.5% 12.5% 12.5% 12.5%

مأخَذُ الفَتوی

کمافی الھندیۃ: عصبة بنفسه وهو كل ذكر لا يدخل في نسبته إلى الميت أنثى وهم أربعة أصناف: جزء الميت وأصله وجزء أبيه وجزء جده، كذا في التبيين (إلی قولہ) ثم ابن الأخ لأب وأم، ثم ابن الأخ لأب الخ (کتاب الفرائض، الباب الثالث في العصبات، ج6، ص 451، ط: مکتبۃ ماجدیۃ)-
فی الدر المختار: ابن الأخ لا يعصب أخته كالعم لا يعصب أخته وابن العم لا يعصب أخته وابن المعتق لا يعصب أخته بل المال للذكر دون الأنثى لأنها من ذوي الأرحام قال في الرحبية: وليس ابن الأخ بالمعصب من مثله أو فوقه في النسب، الخ (کتاب الفرائض، فصل فی العصبات، ج6، ص 783-784، ط: ایچ ایم سعید)-