والد سے پہلے انتقال کرنے والے بیٹے کا ترکہ میں حصہ کا حکم

کیا فرماتے ہیں مفتیانِ کرام ،اس مسئلہ کے بارے میں کہ ہمارے والد صاحب کا 2021 میں انتقال ہوگیا تھا، بوقتِ انتقال ان کے ورثاء میں بیوہ، دو بیٹے، اور چار بیٹیاں حیات تھیں، جبکہ ہمارے ایک بھائی کا والد صاحب کی حیات میں ہی انتقال ہوگیا تھا، ان کے ورثاء میں ان کی ایک بیوہ، دوبیٹے، اور ایک بیٹی حیات تھیں، اب بھائی کی بیوی اور بچوں کا کہنا ہے کہ ہمیں مرحوم کا جوحصہ والد صاحب کے ترکہ سے بنتا ہے، وہ ہمیں دیاجائے، اور مرحوم بھائی کی اپنی تو کوئی پراپرٹی نہیں تھی،والد صاحب کےساتھ مشترکہ رہائش تھی، تو معلوم یہ کرنا ہے کہ ہمارے والد صاحب کے ترکہ سے ہمارے بھائی کا یا اس کے بچوں کا حصہ بنتا ہے یا نہیں، قرآن و سنت کی روشنی میں واضح فرمائیں۔

الجوابُ حامِدا ًو مُصلیِّا ً

واضح ہو کہ والد کی زندگی میں جس بیٹے یا بیٹی کا انتقال ہوجائے، تو اس کا یا اس کی اولاد کا اس کے والد کی میراث میں شرعاً کوئی حصہ نہیں بنتا، اور نہ ہی وہ اس کا مطالبہ کرسکتے ہیں، لہٰذا صورتِ مسئولہ میں مسمٰی یاسر مرحوم اور اس کی اولاد کا مرحوم والد کے ترکہ میں شرعاً کوئی حصہ نہیں، البتہ اگر مرحوم کے ورثاء اپنی مرضی سے مرحوم بھائی کی اولاد کے ساتھ صلہ رحمی کے طور پر انہیں بھی کچھ دینا چاہیں، تو اس کا انہیں اختیار حاصل ہے، تاہم ایسا کرنا شرعاً ان پر لازم و ضروری نہیں، چنانچہ مرحوم بھائی کی اولاد کو خود سے اپنا حق جتلاکر مطالبہ کرنے سے احتراز چاہیئے۔

مأخَذُ الفَتوی

کما فی صحیح البخاری : عن ابن عباس رضي اللّٰه عنهما قال: قال رسول اللّٰه صلی اللّٰه علیه وسلم: ألحقوا الفرائض بأهلها فما بقي فهو لأولی رجل ذکر (باب میراث الولد من ابیہ وامہ، ج: 4، ص: 2959، رقم: 2732، م: بشرٰی)۔
و فی تکملة فتح الملهم : ولو کان مدار الإرث علی الیتم والفقر والحاجة لما ورث أحد من الأقرباء الأغنیاء، وذهب المیراث کله إلی الیتامیٰ والمساکین (الٰی قولہ) وأن معیار الإرث لیس هو القرابة المحضة ولا الیتم والمسکنة، وإنما هو الأقربیة إلی المیت اھ
و فیھا ایضاً : وقد ذکر الإمام أبوبکر جصاص الرازي رحمه اللّٰه في أحکام القرآن،2: 101 والعلامة العیني في عمدة القاري، 23: 238،الإجماع علی أن الحفید لایرث مع الابن اھ ۔( باب الحقوا الفرائض الخ، ج: 2، ص: 17، 18، م: دارالعلوم کراتشی)۔
وفی الشامیۃ : وموضوعه: التركات، وغايته: إيصال الحقوق لأربابها، وأركانه: ثلاثة وارث ومورث وموروث، وشروطه ثلاثة: موت مورث حقيقةً أو حكمًا كمفقود أو تقديرًا كجنين فيه غرة، ووجود وارثه عند موته حيًّا حقيقةً أو تقديرًا كالحمل، والعلم بجهل إرثه اھ (کتاب الفرائض، ج: 6، ص: 758، م: سعید)۔