شان باری تعالٰی میں کفریہ الفاظ کہنے والی عورت کے ایمان و نکاح کا حکم

السلام علیکم! ایک شادی شدہ لڑکی جس نے حالات اور گھریلو معاملات سے پریشان ہوکر نامناسب کلمات زبان سے نکال دئیے، جو مندرجہ ذیل ہیں، اس نے اللہ تعالٰی کے بارے میں ایسا کہا کہ میں اس کو رب نہیں مانونگی، اس کی نماز بھی نہیں پڑھونگی، اس کی عبادت بھی نہیں کروں گی، اس کا کچھ بھی نہیں کروں گی، وہ میرا سب کچھ چھین لیتا ہے، اس طرح اس نے پانچ جملے کہے،تو شرعاً اس کا کیا حکم ہے؟ جواب دیکر شکریہ کا موقع عنایت فرمائیں، جزاک اللہ خیراً۔

الجوابُ حامِدا ًو مُصلیِّا ً

سوال میں ذکر کردہ وضاحت اگر واقعۃً درست اور مبنی برحقیقت ہو، اس میں کسی قسم کی دروغ گوئی اور غلط بیانی سے کام نہ لیا گیا ہو، اور لڑکی مسماۃ فرحانہ نے یہ الفاظ اپنے ہوش و حواس میں کہہ دیئے ہوں تو اس کی وجہ سے مسماۃ فرحانہ دائرہ اسلام سے خارج ہوچکی ہے، چنانچہ اب اس پر تجدید ایمان و تجدید نکاح اور آئندہ کے لئے اس طرح کے کلمات کہنے سے اجتناب لازم ہے۔

مأخَذُ الفَتوی

کما فی رد المحتار: ثم قال في البحر والحاصل: أن من تكلم بكلمة للكفر هازلا أو لاعبا كفر عند الكل ولا اعتبار باعتقاده كما صرح به في الخانية ومن تكلم بها مخطئا أو مكرها لا يكفر عند الكل، ومن تكلم بها عامدا عالما كفر عند الكل ومن تكلم بها اختيارا جاهلا بأنها كفر ففيه اختلاف. اهـ (ج4 صـ224 ، ط: دار الفکر)۔
وفیہ ایضاً: أن ما فيه خلاف يؤمر بالتوبة والاستغفار وتجديد النكاح الخ (ج4 صـ259 ، ط: دار الفکر)۔
واللہ اعلم بالصواب