مصائب کا نزول کا سبب صرف جادو نہیں

کیا فرماتے ہیں علماءِکرام اس مسئلہ کے بارے میں کہ ہمیں کسی نے بہت تنگ کردیا ہے کبھی ہمارے اوپر جادو کرتا ہے اور کبھی ہمارے اوپر بندش کرتا ہے جس کی وجہ سے ہمارے گھر والے یعنی والد صاحب، والدہ اور میں بذاتِ خود بہت سخت بیماری میں مبتلا ہیں، ڈاکٹروں سے کافی علاج کروائے مگر اثر نہیں ہوا پھر ایک عامل سے علاج کروایا تو اس نے کہا کہ آپ پر جادو کا اثر ہے لیکن اس نے بندہ بتانے سے انکار کردیا، اب معلوم یہ کرنا ہے کہ ایسے شخص کے خلاف ھکی ختم کرنا کیسا ہے جس نے ہم سب گھر والوں کو پریشان کیا، تاکہ ہمیں وہ شخص معلوم ہوجائے۔
نوٹ: ھکی ختم سے مراد ’’لا الہ الا انت سبحانک انی کنت من الظالمین‘‘ ایک لاکھ مرتبہ پڑھ کر اس کیلئے بددعا کرنا ہے۔

الجوابُ حامِدا ًو مُصلیِّا ً

کسی شخص پر مصائب و بیماریوں اور مشقتوں وغیرہ کا آنا صرف جادو یا بندش وغیرہ کے ساتھ ہی لازم نہیں بلکہ ان مصائب وغیرہ کے کئی ایک اسباب ہیں مثلاً گناہوں کی نحوست کی بناء پر، کسی بڑی بیماری اور پریشانی سے بچانے اور اللہ تعالیٰ کا محبوب بندہ بنانے کیلئے، اس بندے کے امتحان کیلئے اور اس کے گناہوں کو معاف کرنے کیلئے بھی یہ مصائب آتے ہیں اور اس کے علاوہ بھی ان کے اسباب ہوسکتے ہیں، جبکہ احادیثِ مبارکہ کی روشنی میں بھی یہ بات بخوبی معلوم ہوتی ہے کہ بسا اوقات ان مصائب کا کسی گناہ گار بندے پر آنا اس کے گناہوں کی معافی اور نیکوکار بندے کی طرف متوجہ ہونا اس کے درجات کی بلندی کا سبب ہوتا ہے۔ فی المشکوٰۃ وعن محمد بن خالد السلمی عن ابیہ عن جدہ قال قال رسول اﷲ ﷺ ان العبد اذا سبقت لہ من اﷲ منزلۃ لم یبلغہا بعملہ ابتلاہ اﷲ فی جسدہ او فی مالہ او فی ولدہ ثم صبرہ علی ذٰلک حتی یبلغہ المنزلۃ التی سبقت لہ من اﷲ۔ رواہ احمد۔ (ج۱، ص۱۳۷) -
اس لئے بلاوجہِ شرعی محض کسی عامل کی بات پر اعتماد کرکے کسی شخص پر بدگمانی کرنا (جو ایک بڑا گناہ ہے) شرعاً جائز نہیں اس سے احتراز لازم ہے اور اگر کسی عامل کے پاس جانا ہی ہو تو ایسے شخص کے پاس کہ وہ باضابطہ عالم اور متقی و پرہیزگار اور دیندار ہو اس کے پاس جانے اور اس کے بتائے ہوئے وظائف پڑھنے میں حرج نہیں جبکہ اتباعِ سنت نبوی کے ساتھ ساتھ روزانہ وظائف و اوراد اور منزل کا پڑھنا تمام امور میں عافیت اور بہتری کیلئے بہت مفید اور کافی ہے اور آیتِ کریمہ کا ختم بھی کیا جاسکتا ہے مگر اس کے بعد بد دعا کے بجائے اپنے لئے دعا کرنی چاہئے۔واﷲ اعلم