امام ابو حنیفہ کے نظریے کہ" ایمان تصدیقِ قلبی کا نام ہے"کی وجہ سے ان پر فرقہ مرجئہ میں سے ہونے کا الزام

کیا فرماتے ہیں مفتیانِ کرام درجِ ذیل مسائل کے بارے میں کہ :
۱۔ سلفی لوگ امام اعظم ابوحنیفہ رحمہ اللہ پر" مرجئہ" ہونے کا الزام لگاتے ہیں، وہ کہتے ہیں کہ "مرجئہ" کی طرح امام صاحب کے نزدیک بھی ایمان صرف "تصدیقِ قلبی" ہی کا نام ہے ، کیا ان کا یہ اعتراض درست ہے؟ آپ سے وضاحت مطلوب ہے؟
۲۔ کیا انسان گناہِ کبیرہ کے ارتکاب کی وجہ سے ایمان سے خارج ہوجاتا ہے ؟

الجوابُ حامِدا ًو مُصلیِّا ً

۱۔ یہ امام اعظم ابو حنیفہ رحمہ اللہ سے متعلق ایک بہت بڑا مغالطہ ہے جس کی بنیاد یہ ہے کہ "مرجئہ" بھی یہ نظریہ رکھتے ہیں کہ ایمان تصدیقِ قلبی کا نام ہے ، اعمال اس کی ماہیت میں داخل نہیں ، مگر اس کے ساتھ ان کا یہ نظریہ بھی ہے کہ اعمال کی کوئی حیثیت نہیں ،نہ ان پر آخرت کی نجات موقوف ہے اور نہ ہی آخرت میں اس پر عذاب کا مدار ہے، مگر احناف رحمہم اللہ خصوصاً حضرت امام اعظم ؒ اس قبیح نظریہ سے بالکل بری الذمہ ہیں ،جبکہ تاریخی واقعات اور آپ کی سوانح سے کثیر العبادات ہونا واضح ہے، مگر جو لوگ اعتراض کرتے ہیں ، وہ اس حقیقت سے واقف ہونے کے باوجود اس مغالطہ میں پڑتے ہیں اور دوسروں کو بھی گمراہ کر رہے ہیں، اللہ تعالیٰ ان کے شر سے بچائے۔
۲۔ اہل السنۃ و الجماعۃ کے نزدیک مرتکبِ کبیرہ ایمان سے خارج نہیں ہوتا ، بلکہ ایسا شخص فاسق و فاجر ہو جاتا ہے ۔

مأخَذُ الفَتوی

فی الملل و النحل : أما إطلاق اسم المرجئة على الجماعة بالمعنى الأول فصحيح لأنهم كانوا يؤخرون العمل عن النية و العقد و أما بالمعنى الثاني فظاهر فإنهم كانوا يقولون : لا تضر مع الإيمان معصية كما لا تنفع مع الكفر طاعة اھ(1/222)۔
و فیه ایضا : و جماعة يرجئون أصحاب الكبائر ، و الكبيرة عندهم لا تضر مع الإيمان بل العمل على مذهبهم ليس ركنا من الإيمان و لا يضر مع الإيمان معصية كما لا ينفع مع الكفر طاعة و هم مرجئة الأمة اه(1/64)۔
و فی فتح الباری : و ارادو بذلك أن الاعمال شرط کماله اھ(1/64)۔
و فی المرقاة المفاتیح : و الحق انه رکن عند المطالبة به و شرط لاجراء الاحکام عند عدم المطالبة اھ(1/108)۔
و فی شرح العقائد : و الکبیرة لاتخرج العبد المومن من الایمان و لاتدخلہ فی الکفر اھ(ص107)۔
و فی مرقاة المفاتيح : لکن المعتزلة علی ان صاحب الکبیرة بین الایمان و الکفر اھ(1/108)۔
و فی منح الروض الازھر فی شرح الفقه الاکبر : و لا نکفر مسلما بذنب من الذنوب و ان کانت کبیرة اذا لم یستحلھا ،و لانزیل عنه اسم الایمان اھ(ص210)۔