غیر مسلموں کی عبادت گاہیں تعمیر کروانا

کیا فرماتےہیں علماءِ کرام و مفتیانِ عظام اس مسئلہ کے بارے میں کہ کوئی مسلمان آدمی چرچ ، مندر، یا کوئی اور غیر مسلموں کی عبادت گاہ صرف اس وجہ سے کہ لوگ اس کو سیکولر اور روشن خیال سمجھیں، بناتا ہے نہ تو وہ بلڈر ہے اور نہ ہی اس کا کوئی تعمیراتی کام ہے، وہ صرف اپنی مشہوری کےلیے اس طرح کا کام کرتا ہے تو اس طرح غیر مسلموں کی عبادت گاہ تعمیر کرانے کا کیا حکم ہے اور اس کا کفارہ کیا ہے؟

الجوابُ حامِدا ًو مُصلیِّا ً

غیر مسلموں کے عبادت خانے تعمیر کرنا یا اس خواہش کا اظہار کرنا خصوصاً جبکہ وہ اپنے آپ کو سیکولر اور روشن خیال ظاہر کرنے کے لیے ہو، قطعاً ناجائز اور حرام ہے، جس کی وجہ سے اس آدمی کے سوءِ خاتمہ کا قوی اندیشہ ہے، اور چونکہ عبادت خانے کسی بھی قوم اور مذہب کا شعار ہوتے ہیں،اگر ان کی تعظیم کی غرض سے ایسا کیا جائے تو یہ طرزِعمل کفر کے زُمرے میں آتا ہے، اس لیے مذکور شخص پر لازم ہے کہ اپنے اراددہ سے باز آجائے اور اپنے اس گناہ پر بصدقِ دل توبہ و استغفار بھی کرے۔

مأخَذُ الفَتوی

ففی الدر المختار: (ولا) يجوز أن (يحدث بيعة، ولا كنيسة ولا صومعة، ولا بيت نار، ولا مقبرة) ولا صنما حاوي (في دار الإسلام) ولو قرية الخ (4/ 202)
و فی حاشية ابن عابدين: فلا يحل للسلطان ولا للقاضي أن يقول لهم افعلوا ذلك ولا أن يعينهم عليه، ولا يحل لأحد من المسلمين أن يعمل لهم فيه،(4/ 204)
و فی الفتاوى الهندية: إن أراد أهل الذمة إحداث البيع و الكنائس، أو المجوسي إحداث بيت النار إن أرادوا ذلك في أمصار المسلمين، وفيما كان من فناء المصر منعوا عن ذلك عند الكل اھ(2/ 247)
وفی تاتارخانیة: إما علی روایة أن القدیمة لاتهدم والحدیثة هل تھدم لم یذکر هذا فی شئ من الکتب وحکی عن أبی الحسن الرستفغنی أنه قال تهدم ولاتترك اھ (۵/۴۴۸)
وفی الدر المختار: (وإن قصد تعظيمه) كما يعظمه المشركون (يكفر) (6/ 754) واللہ أعلم بالصواب