کیا سنت یا نفل پڑھنا ضروری نہیں ہے؟

کیا فرماتے ہیں علمائے کرام اس بارے میں کہ ایک آدمی کہتا ہے کہ نماز میں صرف فرض ادا کرنا ضروری ہے، اور سنت یا نفل پڑھنا ضروری نہیں ہے اگر پڑھوگے تو ثواب ہے نہیں پڑھوگے تو کوئی گناہ نہیں ہوتا نماز ہوجاتی ہے، آپ سے یہ پوچھنا ہے کہ کیا بغیر کسی مجبوری کے سنت اور نفل ترک کردینا ٹھیک ہے کیا ترک سنت والا گناہگار نہیں ہوتا؟ اور جس شخص نے یہ کہا ہے وہ پڑھا لکھا بھی ہے اور اپنے آپ کو سید بھی کہلواتا ہے، برائے مہربانی آپ قرآن و سنت کی روشنی میں تفصیل کے ساتھ تحریر کرکے دیں تاکہ ہم اس شخص کو بتاسکیں اور اپنے پاس رکھ سکیں تاکہ کوئی غلط فہمی نہ ہو۔ شکریہ!

الجوابُ حامِدا ًو مُصلیِّا ً

صورتِ مسئولہ میں شخصِ مذکور کی سنت سے مراد اگر سنت غیر مؤکدہ (مثلاً عصر کی فرض نماز سے پہلے پڑھی جانے والی سنتیں) ہوں، تو ان کے بارے میں اتنی بات درست ہے کہ ان سنتوں کے پڑھنے والے کو ثواب ملتا ہے اور نہ پڑھنے والے کو کوئی گناہ نہیں ہوتا، مگر ان سنتوں کو غیر ضروری سمجھ کر بالکل ہی چھوڑدینا یا ان سے لاپرواہی برتنا بہت بڑی بدنصیبی ہے، اور اگر سنت سے فجر، ظہر، مغرب اور عشاء کے بعد پڑھی جانے والی سنن مؤکدہ مراد ہوں تو چونکہ اس قسم کی سنتوں کا پڑھنا مثلِ واجب ضروری اور بلاوجہ مستقلاً ان کو چھوڑنے والا بہت سخت گناہ گار ہوتا ہے جس کو نبی کریم ﷺ نے اپنی شفاعت سے محرومی کی وعیدِ شدید بھی سنائی ہے،
لہٰذا شخصِ مذکور کا اس قسم کی سنتوں کے بارے میں یہ کہنا کہ سنت پڑھنا ضروری نہیں الخ۔ قطعاً غلط اور بے بنیاد بات ہے( جواگر استخفافا یعنی سنت کو ہلکا سمجھنے کی وجہ سےہو تو موجبِ کفر بن سکتی ہے،) اس لئے شخصِ مذکور کو چاہئے کہ اپنے اس قولِ باطل پر صدقِ دل سے توبہ واستغفار کرے، اور آئندہ کے لئے اس قسم کی باتوں سے مکمل اجتناب کرے۔

مأخَذُ الفَتوی

فی البحر الرائق: وھکذا صححہ فی العنایۃ والنہایۃ لان فیہا وعیدا معروفا قال علیہ الصلاۃ والسلام من ترک أربعا قبل الظہر لم تنلہ شفاعتی وفی التجنیس والنوازل والمحیط رجل ترک سنن الصلوات الخمس ان لم یر السنن حقا فقد کفر لأنہ ترک استخفافا وان رأی حقا منہم من قال لا یأثم والصحیح انہ یأثم لانہ جاء الوعید بالترک۔ اھـ
(الی قولہ): بأن السنۃ المؤکدۃ بمنزلۃ الواجب فی الإثم بالترک کما صرحوا بہٖ کثیرا وصرح بہ فی المحیط ہنا وانہ لا یجوز ترک السنن الموکدۃ ولو صلی وحدہ وہو احوط۔ اھـ (ج:۲، ص:۴۹) وﷲ اعلم!