اگر ورثاء میں بیوہ دو بیٹے اور چھ بیٹیاں ہوں تو ان میں میراث کیسے تقیسم ہوگی؟

السلام علیکم ورحمۃ اللہ و برکاتہ !جناب مجھے ترکے کے بارے میں فتوی معلوم کرنا ہے ،میرے مرحوم شوہر کا ایک مکان ہے،میرے مرحوم شوہر جن کا انتقال (1997 )میں ہو گیا تھا،میرے مرحوم شوہر کی پہلی بیوی سے چار بیٹیاں اور دو بیٹے ہیں،میرا جب نکاح ہوا میری ایک بیٹی تھی، اور پھر نکاح کے بعد دو بیٹیاں اور پیدا ہوئیں ،محترم قرآن و سنت کی روشنی میں آپ ترکہ کا بتائیں، کہ ہم کس طرح ترکہ تقسیم کریں، اور کس کس کو کتنا حصہ ملے گا، جزاک اللہ خیراً۔
نوٹ : مرحوم کی پہلی بیوی کا انتقال ان کی زندگی میں ہی ہوگیا تھا ،اور مرحوم کے والدین بھی پہلے وفات پا چکے تھے ۔

الجوابُ حامِدا ًو مُصلیِّا ً

صورتِ مسئولہ میں سائلہ کی جو بیٹی سائلہ کے پہلے شوہر سے پیدا ہوئی ہے ،اس کو سائلہ کے مذکور مرحوم شوہر کے ترکہ میں سے شرعاً حصہ نہیں ملے گا،البتہ جو دو بیٹیاں مرحوم شوہر سے پیدا ہوئی ہیں ،ان کو بقیہ ورثاء کی طرح ان کا شرعی حصہ ملے گا ۔
اس کے واضح ہوکہ سائلہ کے مرحوم شوہر کا ترکہ اصول میراث کے مطابق اس کے موجود ورثاء میں اس طرح تقسیم ہوگا کہ مرحوم نے بوقت انتقال جو کچھ منقولہ و غیر منقولہ مال و جائیداد ، سونا، چاندی، زیورات، نقدر قم اور ہر قسم کا چھوٹا بڑا گھر یلو ساز و سامان اپنی ملکت میں چھوڑا ہے ، اس میں سے سب سے پہلے مرحوم کے کفن دفن کے متوسط مصارف ادا کریں، اس کے بعد دیکھیں کہ اگر مرحوم کے ذمہ کچھ قرض واجب الادا ہویا بیوہ کا حق مہر ادا نہ کیا ہو تو وہ ادا کریں، اس کے بعد دیکھیں کہ اگر مرحوم نے کوئی جائز وصیت کی ہو تو بقیہ مال کے ایک تہائی (3/1) کی حد تک اس پر عمل کرکےاس کے بعد جو کچھ بچ جائے اس کے (80)حصے بنائے جائیں جن میں سے مرحوم کی بیوہ (سائلہ کو (10) حصے ، ہر بیٹے کو (14) حصےاور اور مرحوم کی چھ بیٹیوں میں سے ہر ایک (7)حصے دیے جائیں ، جیسا کہ ذیل کے نقشہ سے بھی واضح ہو رہا ہے ، مزید سہولت کیلئے فیصدی حصے بھی لکھ دیے گئے ہیں۔
مسئلہ 8/80 المضروب/10
میــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بیوہ بیٹا بیٹا بیٹی بیٹی بیٹی بیٹی بیٹی بیٹی
1 70/7
10 14 14 7 7 7 7 7 7
12.5% 17.5% 17.5% 8.75% 8.75% 8.75% 8.75% 8.75% 8.75%