زندگی میں بیٹیوں کی رضامندی سے مکان بیٹے کے نام کرنے کاحکم

جناب حضرت والا السلام علیکم ! میرا مسئلہ یہ ہے کہ میری چار بیٹیاں اور ایک بیٹا ہے، چاروں بیٹیوں اور بیٹے سب کی شادی ہو چکی ہے ،میرا ایک فلیٹ ہے ،جس میں ،میں بیٹے کے ساتھ رہ رہی ہوں ، یہ فلیٹ مجھ کو شادی کے وقت میرے بھائی نے دیا تھا، کچھ قسطیں رہ گئی تھیں، جو میرے شوہر نے ادا کیں ، میں فلیٹ بیٹے کے نام کرنا چاہتی ہوں، میں نے بیٹیوں سے اس بارے میں پوچھ لیا ہے ، وہ بخوشی اس بات پر رضا مند ہیں کہ فلیٹ بیٹے کے نام اپنی زندگی میں ہی کر دوں ، اس سلسلہ میں آپ سے گزارش ہے کہ میری راہ نمائی فرمائیں۔

الجوابُ حامِدا ًو مُصلیِّا ً

اگر چہ سائلہ بلا کسی جبر و اکراہ کے پورا مکان اپنے بیٹے کو بھی دے سکتی ہے، اور اس سلسلہ میں محض بیٹے کے نام کر وا دینا ہی کافی نہیں، بلکہ اس کے ساتھ باضابطہ مالکانہ قبضہ دینا بھی شرعاً لازم ہے، تاکہ بیٹے کی ملکیت ثابت ہو سکے ، البتہ درست یہ کہ بیٹیوں کو بالکل محروم نہ کرے، بلکہ انہیں بھی کچھ نہ کچھ ضرور دے ، تاکہ گناہ سے بچ سکے ۔

مأخَذُ الفَتوی

کما في الدر المختار: (وتتم) الهبة (بالقبض) الكامل (ولو الموهوب شاغلا لملك الواهب لا مشغولا به) اھ(5/ 690)۔
و في الفتاوى الهندية: ولو وهب رجل شيئا لأولاده في الصحة وأراد تفضيل البعض على البعض في ذلك (إلی قوله) أنه لا بأس به إذا كان التفضيل لزيادة فضل له في الدين وإن كانا سواء يكره وروى المعلى عن أبي يوسف رحمه الله تعالى أنه لا بأس به إذا لم يقصد به الإضرار وإن قصد به الإضرار سوى بينهم يعطي الابنة مثل ما يعطي للابن وعليه الفتوى هكذا في فتاوى قاضي خان وهو المختار كذا في الظهيرية رجل وهب في صحته كل المال للولد جاز في القضاء ويكون آثما فيما صنع كذا في فتاوى قاضي خان اھ (4/ 391) واللہ اعلم بالصواب!