ضحی اور زمل نام رکھنا کیساہے

السلام علیکم، میں 26 اکتوبر کو پیدا ہونے والی اپنی بچی کے نام 'ضحی' اور ' زمل ' کے بارے میں پوچھنا چاہتا ہوں.. براہ کرم مجھے اصلیت، ہجے اور تلفظ کے بارے میں درست تفصیلات ارسال کریں۔,

الجوابُ حامِدا ًو مُصلیِّا ً

عربی لغات میں زمل کے مختلف تلفظ کے ساتھ مختلف معانی ملے ہیں ، چنانچہ "زَمَل"(ز اور م کے زبر کے ساتھ )کے معنی ہیں: ایک جانب کو جھکے ہوئے دوڑنا، لنگڑاتے ہوئے چلنا، "زَمِل"(ز کے زبر اور م کی زیر کے ساتھ) کے معنی ہیں :کم زور، بزدل ، "زُمَل" (زا پر پیش اور میم پر زبر) ہو تو اس کا معنی ہیں: بزدل، کمینہ۔
"زِمْل"(زاء کی زیر ،اور م کے سکون کے ساتھ)کے معنی ہیں : جانور پر پیچھے سوار ہونے والا،ردیف،بوجھ، کمزور، سست و کاہل، اس لئے معنی کے مناسب نہ ہونے کی وجہ سے یہ نام رکھنے سے تو احتراز چاہیئے۔
جبکہ " ضحی " کے معنی چاشت کے وقت اور چڑھتے سورج کے آتے ہیں ، اس معنی کے اعتبار سے یہ نام رکھنا اگرچہ جائز اور درست ہے ، تاہم بچی کا نام صحابیات یا امت کی کسی صالحہ عورت کے نام پر رکھنا زیادہ بہتر ہے۔

مأخَذُ الفَتوی

کما فی مرقاة المفاتيح : "وعن أبي الدرداء - رضي الله عنه - قال: «قال رسول الله صلى الله عليه وسلم: " تدعون يوم القيامة بأسمائكم وأسماء آبائكم، فأحسنوا أسماءكم» " رواه أحمد، وأبو داود." (کتاب الاداب باب الاسامی ج: 8، ص: 526، ط: حقانیۃ)۔
و فی القاموس الوحید: "زَمَلَ - زَمْلاً و زَمَلَاناً: ایک پہلو پر زور دے کر دوڑنا، ایک اوپر اٹھا کر دوسرے پیر پر دوڑنا ( الی قولہ) الزّامِلُ: پھرتی کی وجہ سے لنگڑا کر چلنے والا چوپایہ۔الزّامِلَةُ: مؤنث.... الزَّامِل بار برداری کا اونٹ وغیرہ۔ ج:زَوَامِل۔( الی قولہ ) الزِّمْلُ: بوجھ۔ زِمْلٌ: پیچھے سوار ہونے والا (ردیف)۔ کمزور اور تھڑدلا۔ سست و کاہل۔ ج: اَزْمَالٌ۔ الزُّمَلُ: بزدل و کمینہ۔" (بابُ الزَاء، ز ___ م، ص:587، ط:ادارہ اسلامیات)۔
و فیہ ایضاً: الضحی: سورج کی روشنی، دن کا چڑھاؤ، دن چڑھنے کا وقت، چاشت، سورج الخ (ص: 962، ط: ادارۃ اسلامیات )۔