کاروبار میں شرکت کا صحیح طریقہ

اسلام وعلیکم !! جناب حضرت میرا موبائل فون کا کاروبار ہے۔۔ میرا کاروبار میں بعض اوقات سرمایہ کاری کی ضرورت درکار ہوتی ہے کیونکہ میرے پاس اتنا سرمایہ نہیں لیکن میرا اللہ پاک کے کرم سے ماشااللہ کاروبار بہت اچھا چلتا ہے، میں کسی کو سرمایہ کار کے طور پر شامل کرنا چاہتا ہوں۔۔ اسکے پاس سرمایہ کاری کے لیے سرمایہ بھی ہے مجھے رہنمائی فرمائیں۔۔ کن شرائط پر شامل کرسکتا ہوں، اور کتنا فیصد منافع اور منافع دینے کا شریعی طریقہ اور اصل سرمایہ واپس کرنے کا طریقہ کار اور مدت منافع کیسے تعین کیا جائے۔ شکریہ

الجوابُ حامِدا ًو مُصلیِّا ً

کاروبار میں شرکت کے لیے درج ذیل بنیادی شرائط کا لحاظ رکھنا ضروری ہے۔
(۱) منافع حصہٴ مشاع (مثلاً جو کچھ نفع ہوگا اس کا نصف، تہائی) کے طور پر طے ہو، متعین رقم کی شکل میں منافع طے کرنا جائز نہیں ہے، تاہم منافع باہم رضامندی سے کسی بھی تناسب سے طے کیا جاسکتا ہے، البتہ اتنا لحاظ ضرور ی ہے کو جو شخص صرف رقم سے شریک ہو، ”عمل“ اس کے ذمے نہ ہو تو اس کے منافع سرمایہ کے تناسب سے زیادہ متعین کرنا درست نہیں ہے۔
(۲) بہ وقتِ عقد دونوں کا سرمایہ معلوم ہو، اور نقد کی شکل میں ہو اگر اثاثہ یا سامان کی شکل میں ہوگا تو شرکت صحیح نہیں ہے؛ ہاں اگر دو فریقوں میں سے ایک کے پاس نقد روپئے اور دوسرے کے پاس سامان ہے اور وہ شرکت کرنا چاہیں تو یہ حیلہ اختیار کرسکتے ہیں کہ سامان کا مالک اپنا آدھا سامان دوسرے کو اس کے نصف روپئے کے عوض فروخت کردے اور دونوں قبضہ کرلیں، پھر تمام روپئے اور سامان کو ملادیا جائے تو روپئے اور سامان دونوں کے درمیان مشترک ہوجائیں گے، پھر اس میں عقد شرکت کرلیں تو جائز ہوگا۔
(۳) اگر کبھی خسارہ ہوجائے تو تمام شرکاء کو بقدر سرمایہ برداشت کرنا ہوگا، خسارہ کو ایک پر ڈالنا شرعاً جائز نہیں ہے۔

مأخَذُ الفَتوی

فی بدائع الصنائع:
منہا (شرائط جواز الشرکة) أن یکون الربح معلوم القدر․․․ وأن یکون جزء ًا شائعًا في الجملة لا معینا․․․ أما الشرکة بالأموال فلہا شروط، منہا أن یکون رأس المال من الأثمان المطلقة․․․ وہي الدراہم والدنانیر عنانًا کانت الشرکة أو مفاوضة․․․ولو کان من أحدہما دراہم ومن الآخر عروض فالحیلة فی جوازہ أن یبیع کل واحد منہما نصف مالہ بنصف دراہم صاحبہ ویتقابضاویخلطا جمیعًا حتی تصیر الدراہم بینہما والعروض بینہما ثم یعقدان علیہما عقد الشرکة فیجوز ( ۵/۷۷، ط: زکریا دیوبند)