لاپتہ شوہر کی بیوی کا عدالت سے جدائی کیسے حاصل کرے؟

میرا مسئلہ یہ ہے کہ میری شادی ہوئی ، اب تین بچے بھی ہیں لیکن میرا شوہرنشہ کرتا ہے ، 2010 میں ہماری شادی ہوئی اور کچھ عرصہ سب صحیح رہا ،لیکن پھر میرے شوہر نشہ کرنے لگ گئے ، گھر کا خرچہ بند کر دیا ، اور اب چودہ ماہ ہو گئے ہیں وہ گھر بھی نہیں آیا ، اور اب پتہ بھی نہیں کہ وہ کہاں ہے، ہم نے ہر جگہ سے پوچھا لیکن اب کچھ پتا نہیں چل رہا، وہ ویسے بھی گھر کا خرچہ نہیں دیتا بلکہ جو میری تنخواہ کے پیسے ہوتے ہیں وہ بھی لے کر جاتا ہے ، مارتا تھا ، میرا مسئلہ یہ ہے کہ جیسے اب شوہر کا کوئی پتہ نہیں اور وہ اپنے حقوق تو بالکل نہیں پورے کر رہا ،نہ خرچہ کے اور نہ ازدواجی زندگی کے ،تو کیا طریقہ ہے ؟میں خلع لوں ؟ مہربانی کر کے راہنمائی کر دیں۔

الجوابُ حامِدا ًو مُصلیِّا ً

سوال میں ذکر کردہ بیان اگر واقعۃً درست اور مبنی برحقیقت ہو ، اس میں کسی بھی قسم کی غلط بیانی اور دروغ گوئی سے کام نہ لیا گیا ہو اس طور پر کہ سائلہ کا شوہر واقعۃً لاپتہ ہو، تو اس صورت میں سائلہ کےلئے اصل حکم یہ ہے کہ اگر وہ صبر کرکے اپنا زمانہ عفت اور پاک دامنی کے ساتھ گزارسکے تو بہتر ہے، اگر صبر نہ کرسکے تو بوقتِ ضرورتِ شدیدہ (کہ خرچ وغیرہ کا انتظام نہ ہوسکے یا بلا شوہر کے رہنے میں مبتلائے معصیت ہونے کا شدید خطرہ ہو) یہ گنجائش ہے کہ صورتِ ذیل اختیار کرکے مفقود کے نکاح سے رہائی حاصل کرے ۔
وہ صورت یہ ہے کہ سائلہ اپنا مقدمہ مسلمان جج کی عدالت میں پیش کرے اور شہادتِ شرعیہ کے ذریعہ ثابت کرے کہ میرا نکاح فلاں شخص کے ساتھ ہوا تھا، اس کے بعد گواہوں سے اس کا مفقود اور لا پتہ ہونا ثابت کرے کہ اتنے عرصے سے میرا شوہر لاپتہ ہے، اور اس نے کوئی نان نفقہ نہیں چھوڑا ،اور نہ کسی کو نفقہ کا ذمہ دار بنایا،اور میں نے اپنا نفقہ معاف بھی نہیں کیا ،اور سائلہ ان باتوں کو گواہوں کی گواہی سے ثابت کرے،اس کے بعد جج خود اپنے طور پر مفقود کی تفتیش و تلاش کرے، جہاں جہاں مفقود کے جانے کا غالب گمان ہو ،وہاں آدمی بھیجا جائے اور جس جس جگہ جانے کا غالب گمان نہ ہو ،وہاں اگر خط کو کافی سمجھے تو خطوط بھیجے اور اگر اخبارات میں شائع کردینے سے خبر ملنے کی امید ہو تو یہ بھی کرے، الغرض تفتیش و تلاش میں پوری کوشش اور جہدِ بلیغ کرے، اور جب تلاش کے بعد مفقود کا پتہ چلنے سے مایوسی ہوجائے تو عورت کو چار سال تک مزید انتظار کا حکم کرے، پھر ان چار سالوں کے اندر بھی مفقود کا پتہ نہ چلے تو سائلہ حاکم کے پاس دوبارہ درخواست پیش کردے جس پر حاکم اس کے شوہر کے مردہ ہونے کا فیصلہ سنادے، اس کے بعد چار ماہ دس دن عدتِ وفات گزار کر سائلہ کو دوسری جگہ نکاح کرنے کا اختیار ہوگا، اور اگر عورت عدالت میں زنا میں مبتلا ہونے کا شدید خطرہ ظاہر کرے اور اس نے ایک عرصہ دراز تک مفقود کا انتظار کرنے کے بعد مجبور ہوکر اس حالت میں درخواست دی ہو، جبکہ وہ صبر سے عاجز آگئی ہو تو اس صورت میں اس کی بھی گنجائش ہے کہ ایک سال کے انتظار کے بعد تفریق کردی جائے اور صورتِ مسئولہ میں یہ تفریق طلاقِ بائن کہلائے گی،البتہ حاکم کے پاس جانے سے قبل جو وقت گزار دیا، اس کا اعتبار نہ ہوگا، نیز سائلہ حاکم کے فیصلہ کے بغیر خود بخود سابق شوہر کے نکاح سے علیحدہ نہیں ہوسکتی اور حاکم کے پاس جب درخواست دے تو حاکم پوری تحقیق کرے اور خود بھی تلاش کرے، اس کے انتظار کی مہلت دے، پھر مہلت کی مدّت ختم ہوجانے پر مذکورہ بالا طریقہ اختیار کرے۔

مأخَذُ الفَتوی